KHAWTHLIR

PYD-in thisen pe

Pentecostal Youth Department (Mizoram) Lengpui Bial chuan nimin khan thisen pek an huaihawt a, Civil Hospital, Aizawl tan thisen unit 34 an pe a, petute mipa 29 leh hmeichhia panga an ni.

Kawngpui enfiah

Lunglei South bialtu MLA Lalramliana Papuia chuan nimin khan Theiriat leh Hrangchalkawn inkar National Highway-54 kawngpui laih zauh hna thawh mek vanga harsatna awm ṭhinte a enfiah. MLA hian Lunglei District Disaster Management Authority team te, NHIDCL hotu te, contractor-te leh khawtlang hruaitute chu kawng dinhmun leh mipuiin harsatna an tawhte chinfel dan tur a sawipui a ni. Kawngpui chu a pawimawh avangin a rang thei ang bera siamṭhat dan kawng zawn ni se, LDDMA enpuina hnuaiah NHIDCL leh contractor-te'n bawhzui nghal se, an ti.

Hygiene pack hlan

Assembly speaker Lalbiakzama chuan nimin khan a pisaah a bial, Chalfilh constituency chhunga Cyclone Remal vanga chhiatna tuar mi 78 hnenah chhawmdawlna atan hygiene pack a hlan. Chhawmdawlna hi Formosa Foundation kaltlanga pek a ni a; Khawlian, Suangpuilawn, Hmunnghak, Sesawng, CTI, Phullen leh Tualbung khuaa in chhuahsante hnenah pek a ni.

GST zirho

Taxation department chuan nimin khan Mamit IPR conference hall-ah Good & Service Tax (GST) Awareness Programme an buatsaih a, Mamit district-a sumdawng, sorkar department hotute leh political party aiawhte an tel. Awareness campaign-ah hian GST nodal officer C Vanlalchhuana'n GST chungchanga hriat tur hrang hrang a sawifiah a ni.

RO/ARO ruat

Mizoram State Election Commission chuan Aizawl Municipal Corporation (AMC) Ward VI-a by-election neih turah returning officer atan Aizawl additional DC Mark Lalthanliana a ruat a, assistant returning officer atan Aizawl SDC Malsawmhriatzuali a ruat bawk. Ward-VI by-election neih hun tur erawh puan a la ni lo.