Ráltlân buhfai leina atan central-in Mizoram hnenah cheng vbc. 5 a pe

Ministry of Home Affairs (MHA) chuan Mizorama ráltlânte leh mahni in leh loa khawsa thei lote'n a thlâwna buhfai an dawn theih nan, an ei tur buhfai leina atan Mizoram sorkar hnenah cheng nuai 500 a rawn pe.

MHA under secretary Prem Parkash chuan July 18, 2024 khan hriattirna (office memorandum) a tichhuak a; Mizoram sorkarin a ngen angin, ráltlânte tana buhfai leina tur cheng nuai 500 Mizoram sorkar hnenah pek a nih thu a tarlang a ni.

MHA Under Secretary lehkhaah chuan, Mizoramah mahni in leh loa khawsa thei lo - ram chhung buaina vanga ráltlân leh khuarel chhiatna vanga mahni in leh loa khawsa thei lo mi 45,000 an awm thu leh, chung mite hnena buhfai pek tur ngaihtuahsak turin Mizoram sorkarin a ngen thu tarlan a ni bawk.

Hemi chungchangah hian ZPM party chuan thuchhuah siamin, "Chief minister Pu Lalduhoma hmalaknain sorkar laipui chuan Mizorama khuarel chhiatna tuarte leh kan ṭhenawm ram aṭanga Mizorama inhumhimna zawnga lo kal mi 45,000 vel ei tur buhfai leina atan cheng vbc. 5 a rawn pe hi lawmawm kan ti a, Chief Minister leh Central sorkar chungah mipui aiawhin lawmthu kan sawi a ni," an ti.

ZPM chuan, "Khuarel chhiatna tuarte leh raltlante hi Mizoram sorkar hian a ngaihsak em em a, kan unaute manganga an awm hi kan sorkar hian a ngaihthah thei lo a, anmahni chhawmdawl nan theihtawpin hma a lak zel kan beisei," an ti a; Mizoram sorkar hmalakna chu ropui leh chhuanawm an tih thu an tarlang a ni.