Pathiannia buhfai hlânthlâk chungchang FCSCA Minister kaihhruaiin sawiho a ni

Food, Civil Supplies & Consumer Affairs (FCSCA) minister B Lalchhanzova hoin nimin khan a pisaah FCSCA department leh Food Corporation of India (FCI) hotu te, Central YMA, Bairabi Joint YMA leh Bairabi North Branch YMA hruaitute'n Pathiannia buhfai hlànthlâk (unload) chungchang an sawiho.

Bairabi Rail Station-a Pathiannia buhfai thleng ṭhin hlantghlak chungchang hi March 21, 2024 khan Bairabi-ah FCSCA Minister hoin sawiho a lo ni tawh a, July ral hmaa ennawn leh tura dah a ni. Ṭhutkhawmah hian FCSCA department leh FCI hotute'n Pathiannia buhfai thleng ṭhin chu a theih anga titlem tura hma an laknate an tarlang.

YMA, Bairabi North Branch hruaitute chuan, Pathiannia buhfai thleng ṭhinin an khawtlang nun eng emaw chen a tihbuai dan an sawi a, "A ṭul angin kan inpawt fán ṭhin," an ti.

Bairabi Joint YMA hruaitute pawhin harsatna an tawh dante sawiin, Pathianni ni loa buhfai thlentir hrâm dan ngaihtuahpui turin thuneitute an ngen.

Central YMA hruaitute chuan, buhfai chu Mizote chaw rin ber a nih avangin Mizoram leh ram páwna awm Zo fate'n buhfaia harsatna kan neih loh nan ṭan tlan a ngaih thu an sawi.

Minister B Lalchhanzova chuan, Bairabi khawtlang leh YMA-te'n Zo nun mawi leh Kristianna vawn nun kawnga an ṭhahnemngaihna chu ropui a tih thu a sawi a; rilru zau tak pu chunga Pathiannia a buhfai a thlen ṭum pawha an lo inpawh fân tawh ṭhinnaah a lawm thu a hrilh.

FCSCA Minister chuan, Railways leh FCI thuneitute nen pawh Pathianni ni loa buhfai thlentir hrâm dan an ngaihtuah chhunzawm tur thu a sawi bawk.