EFCC-in Forest Training School chhunga dan loa chêtna dem

Environment, Forest & Climate Change (EFCC) department chuan thuchhuah siamin, Bethlehem Vengthlang mite Forest Training School (FTS) complex chhungah dan loa an chê leh sorkar thuneitute thu loa an che chu an dem thu an tarlang.

EFCC thuchhuah tarlan danin, Bethlehem Vengthlang Local Council Chairman leh YMA branch President chu July 5, 2024 khan FTS Principal hnenah lehkha an pe a; FTS paltlanga tennis court panna kawng awm sa chu zauh deuha laih tlang an tum thu leh an hmalaknaah harsatna siam lo turin a hriattir a ni.

FTS Principal chuan July 11, 2024-ah hriattirna tichhuakin, FTS huam chhungah kutthlak phal a nih loh thu leh phalna nei hmasa lo chuan kutthlak lo tura tihna te, Bethlehem Vengthlang khawtlang duh dan kalpui a nih theih nan ruahmanna awm sa a awm nih chuan a rang lama hriattir tura tihnate tarlan a ni a; lehkha chu Bethlehem Vengthlang LC leh YMA hruaitute pek a ni.

FTS Principal chuan July 22, 2024 khan hriattirna tichhuak lehin, Bethlehem LC leh YMA-te chu anmahni thua kutthlak lo tur leh, FTS chhunga phalna nei loa kutthlak an awm a nih chuan dan anga hmalak a nih tur thu a tarlang a; khawtlang tana ram mamawh a awm a nih chuan dan anga hmalak theih a nih thu a tarlang bawk.

EFCC department chuan, FTS Principal hriattirna ngai pawimawh loin nimin khan FTS gate leh tennis court hungna palte chu tihchhiat niin, kawng laih ṭan a nih thu an tarlang a, "Hetianga dan loa sorkar hmunhma tichhe zawnga Bethlehem Vengthlang mi ṭhenkhatte hmalakna hi pawi kan tiin kan dem hle a, FTS complex chhunga dan loa chetna hi kan dem tak zet a ni," an ti.