ZPM sorkarin CBI hman an tum dan Kristian rama thlengah a mawi lo - MNF Legal Board

MNF Legal Board hotute chuan nimin khan Aizawl Press Club-ah thuthar thehdarhtute an kâwm a; ZPM sorkarin CBI hman an tum dan chu Kristian rama thlengah a mawi loa an ngaih thu an sawi.

MNF Legal Board vice chairman Lalpianfela Chawngthu chuan, ZPM kaihhruai sorkarin eirukna do a tum tak tak lo niin a sawi a, "Mipui ṭanghma ngaia eirukna do an tum tak tak a nih chuan CBI hnenah Chief Minister-in nasa taka a lo tlangaupui tawh ang ngeiin general consent pe leh nghal turin kan phût. CBI chhui tur leh chhui loh tur thlan kual velna atana hun khawh ral lo turin kan ngen," a ti.

Lalpianfela Chawngthu chuan, Lokayukta-a thubuai pathum chhuitir turin ZPM Legal department-in Lokayukta an ngen thu sawiin, "ZPM sorkar leh CM hian an huat zawngte chauh CBI chhuitir a, an lamṭangte erawh hum zel an tumzia a lantir. Politics-a phuba lakna hmanruaa CBI hman an tum dan lo lang chhuak nghal hi vanduaithlak tak a ni," a ti a; Kristian rama thleng atan pawha mawi loa an ngaih thu a sawi.

MNF Legal Board chuan, ZPM sorkarin CBI hmanga eirûkna do an tum tak tak a nih chuan Home department-a open tender lem tihchhuah dan te, Lok Sabha MP-in Hnahlana grape chingtute chan ai 35% (cheng nuai 100 chuang) a lo lak chungchang te, buhfai supply-tu tur thlan dan te, work supervisor vuaha party worker-te hnena dan kalha contract hna pek chungchangte CBI chhuitir tura ngen tel nghal turah an ngai tih an tarlang.

ZPM sorkar hnuaia thil dik lo awmte chu CBI chhuitir tura ngenna an thehluh an tum leh tum loh zawhna chhángin MNF Legal Board hruaitute chuan, "MP-in 35% a lak chungchang chu CBI leh ACB-ah kan thehlut ve ve tawh. ACB-in preliminary inquiry an ti mek niin kan hria a, CBI erawh chu an la reh vang vang," an ti.

MNF Legal Board chuan, MNF-a an pute an him loh an hlauhpui vanga ZPM Legal department ngenna sawisel an nih leh nih loh zawhna chhangin, "A ni lo. Heng thilah hian kan pute an fihlim ngei ang tih kan chiang," an ti a; thil dangte pawh CBI chhuitir turin ngen law law se an duh vang a nih thu an sawi.

CBI hnena general consent pek ṭha an tih leh tih loh zawhna chhangin MNF Legal Board-a hruaitu pakhat chuan, "A ṭha kan ti," a ti. MNF sorkar laiin CBI hnena general consent an pek loh chhan zawhna chhángin, hun kal tawh a ni a, hun kal tawh chu hun kal tawh a nih thu a sawi a; Lalpianfela Chawngthu erawh chuan, MNF sorkar hnuaiah Mizoram police an ṭha tâwk a, Mizoram police-te an rin tâwk avangin CBI hnenah general concent pek a nih loh thu a sawi thung.

MNF Legal Board chuan, kuhva tawlh rûk thla kha chhunga tihtawp tum sorkarna hnuaiah Gauhati High Court, Aizawl Bench-in kuhva tawlh chungchang CBI a chhuitir dawn tih sawiin, "Court lungawina khawpa hmalakna ZPM sorkarin a neih theih loh avanga CBI kuta kuhva chungchang chhui tur thu a pek a ngai ta hi sorkar tan mualphona nasa tak a ni," an ti a; dan leh thupek kenkawh kawnga sorkar hlawhchhamzia tilangtu a nih thu an sawi bawk.

MNF LEGAL BOARD SAWI DANGTE

■ ZPM sorkar hian thil tih tak tak tum loin, sorkarna an chan theihna tura mipui bumnna atan chauh CBI general consent pek hi an aupui mai mai a ni tih a chiang.

■ Chief Minister-in a lo intiam tawh ang ngei general consent, a hmaa an lo pek tawh kha sorkarin tinung leh ngei turin kan phût.

■ CBI chhui tur leh chhui loh tur thlang kual loin, CBI-te'n an chhui duh zawng chu an rawn chhui mai theih nan ZPM sorkar hian hma la ngei se tih hi kan duh dan a ni.