Tuidam - Darlak via Sabual lui kawngah YMA-in lirthei lian tlân an phal lo

YMA, Taitesena Group leh Langkaih Group chuan, NH-44A Tuidam - Darlak via Sabual lui kawng chu a chhiat em avangin July 25, 2024 (Nilaini) aṭang chuan lirthei lian tlân phal a nih loh thu nimin khan an tarlang.

Tuidam-Darlak kawngpui chhia chungchangah hian nimin khan Langkaih Group YMA, Taitesena Group YMA, Hachhek constituency huam chhunga VC, political party, Hachhek Constituency Maxicab Welfare leh Langkaih Balu Phur Welfare aiawhte Kawrthah Hmarveng YMA Rûnah an ṭhukhawm a; kawng chhe lutuk chungchanga hmalak dan tur an ngaihtuah.

Ṭhutkhawmah hian, kawng siamṭhat a nih thuai theih nan a ṭul anga hma la turin YMA, Langkaih Group leh Taitesena Group office bearer-te ruat an ni a, "Anni hian thuneitute lo dawrin, a ṭul a nih chuan mipui hnatlang pawh ko mai se kan ti," tiin an rêl.

Langkaih leh Taitesena group YMA chuan, Hachhek biala kawng pawimawh NH-44A chu a chhe hle tih tarlangin, "Kawng zawhtu khualzin leh lirthei hrang hrangte nunna thàpin kan kal a ni mai a, June thla chhung pawh khan lirthei chesual (kawngthlanga lum) pathum a awm. NH-44A leh kawng hlui hi a rang lama siam vat a nih loh chuan chhiatna nasa zawk thleng thei reng a ni," an ti.

YMA group pahnihte chuan, Tuidam-Darlak via Sabual lui kawng chu lirthei lian (HMV, MMV) tan zawh ngam chi a nih loh thu tarlangin, "NH-44A Tuidam-Darlak (via Sabual lui) hi kan zavaia him tlan nan leh chetsualna pawi zawk a thlen loh nan July 25, 2024 (Ningani) aṭang hian lirthei lian (HMV, MMV)-te chuan chhuk leh chho zawngin thu leh awm hma chu zawh tawh rih lo se tiin vawiina Hachhek biala pawl hrang hrangte chuan thutlukna kan siam," a n ti a; an ruahanna chu zâwm turin mi tin an ngen.

Kawng ṭha an neih theih nan theihtawp an chhuah zel dawn thu tge, lirtheite him zawka an tlân theih nan kawng siam vat a nih an beisei thute an tarlang bawk.