Dárlâk leh Tuidam inkar kawngpui chhe lutuk siamṭha turin sorkar phût

Hachhek bialtu MLA Robert Romawia Royte chuan Hachhek bial huam chhungah kawngpui chhe lutuk siamṭha thuai turin PWD Minister a ngen. Hachhek Constituency Development Committee pawhin thuchhuah siamin, Dárlâk leh Tuidam inkar kawng chhe lutuk chu July 2024 chhung ngeia a chhe zual lai thawm ṭha turin sorkar an phût.

MLA Robert Romawia Royte chuan July 22, 2024 khan PWD minister Vanlalhlana hnenah lehkha thawnin, Hachhek biala kawngpuite siamṭha turin a ngen a, "Darlak leh Tuidam inkar kawngpui hi a chhe nasa em em mai a, he kawng pawimawh tak hi siamṭhat vat a nih theih nan a ṭul; anga hma la turin ka ngen tak meuh a che," a ti.

Hachhek Constituency Development Committee (HCDC) chuan, Darlak-Tuidam kawng chhe lutuk chu lungawithlak loh an tih thu an tarlang a, "He kawng hi khawthlang fate tana pawimawh tak a nih avangin a rang lama a chhe laite min siamṭhatsak turin Mizoram sorkar kan ngen tak meuh meuh. July 2024 chhung ngei hian a ṭha lo laite min siamṭhat sak turin kan ngen a ni," an ti a; July thla chhunga hmalakna emaw, siamṭhat tumna emaw a awm loh chuan HCDC-in hma an lak dawn thu an tarlang.

HCDC chuan, Hachhek constituency chhunga PMJVK hnuaia project hrang hrang thawh zawh ṭêp tawh chu sorkarin contractor-te hnenah bill-a pek theih loh avangin zawh theih loh tam tak a la awm niin an sawi a, "Tunah hian PMJVK hnuaiah crore 35 hman lohin a awm mek niin kan hria. Hna thawh zawh a nih vat theih nan contractor-te hnenah an thawh phu tâwkin bill pe chhuak vat turin sorkar kan ngen," an ti.