Sorkar website ṭha ber - Transport dept.

Information, Communication & Technology (ICT) department chuan nimin khan sorkar department leh office zinga information technology (IT) hmang ṭangkaite hnenah Government Online Excellence Awards hlanna inkhawm an buatsaih a; chief minister Lalduhoma'n hmanpuiin, department/office website ṭha bera thlan Transport department hnenah lawmman a hlan.

Assembly House Annexe conference hall-a award semna inkhawmah Lalduhoma chuan, IT-in hna rang zawk, awlsam zawk leh tlawm zawk a pe tih sawiin, "Mipui leh sorkar tan hlâwkna min pe ve ve a, huapzo sorkar neihna hmanraw ṭangkai a ni," a ti a; website ṭha tak neite leh online service kalpui mekte chu uar zel tura chahin, "A la hmang ṭha tâwk lote pawhin lo hmang ṭha ang che u. Department ṭhenkhat, in update ṭha tâwk lote chu CM Office-in uluk lehzualin a en zui dawn," a ti.

Chief Minister chuan, "Mipui Aw te, CM Online-te ṭha takin kan kalpui. Ṭangkai lehzuala hman tumin kan rama project kan kalpui zawng zawngte engtik lai pawha kan lo endik theihna tur SIT Dashboard kan duang mek a, kan peih har tawh lo ang," a ti a; an sorkar tirh aṭangin IT hman an uar thu a sawi.

IT-in khawvel kalphung a thlak danglam chho zel tih sawiin Lalduhoma chuan, "E-commerce te, telemedicine te, online payment leh social media platform tam tak a lo chhuak a, khawvel ram zau tak ni ṭhin kha a lo zim ta," a ti a; IT vanga awlsamna chu sorkar inrêlbàwlna lamah pawh an chhawr nasat thu a sawi.

ICT minister Dr Vanlalthlana pawhin thu sawiin, IT-a hmasawnnain sorkar inrêlbàwlna man nasa takin a titlem a, lamhla zawk aṭanga sorkar office dawrtute tan remchang tam tak siam tih a sawi a, "IT lama hmalakna kan uar deuh deuh a ṭul a, mite hnunga kal loin an hmaa kal kan tum zawk tur a ni," a ti.

Inkhawmah hian chief secretary Dr Renu Sharma, ICT secretary SM Ali leh chief informatic officer Dr Lalthlamuana te pawhin thu an sawi a ni.