ZPM-in candidate tur an puang

ZPM party chuan Aizawl Municipal Corpo­ration (AMC) Ward-VI by-election awm tura an party candidate atan H Lalremtluanga s/o H Biak­chhunga, Chanmari West thlan a nih thu nimin khan an pisaah an puang.

H Lalremtluanga hi zirna lamah BA a ni a, MSACS hnuaiah outreach worker hna leh SIPMIU-ah assistant programme director hnate a thawk tawh ṭhin. KṬP, Chanmari West Branch leh Chanmari Bial-ah nihna hrang hrang a chelh tawh ṭhin a, kuminah kohhranah upa atan thlan a ni.

H Lalremtluanga chuan, candidate atana ZPM-in an thlang chu lawmawm a tih thu sawiin, "Tawnhriat la nei lo ka nih avang leh he dinhmun hi dinhmun sang tak a nih avangin thutlukna siam a har hle. Pathian zara hlawhtlinna kan chang a nih chuan kan ward chhung­ah hmasawnna hna a tam thei ang ber dik tak leh thianghlim taka thawk turin ka inpe a ni," a ti.

AMC Ward-VI hian Chanmari West, Edenthar Veng leh Hunthar Vengte a huam a; kum 2021 general election-a thlan tlin John Zosangliana a thih avangin by-election neih a ni dawn a ni.