AMC corporator thar lak luh a ni

Aizawl Municipal Corporation (AMC) corpo­rator atana Ward XIX by-election-a thlan tlin Dr C Malsawmtluangi, Hlimen chu nimin khan AMC Board of Corporators Meeting Hall-ah AMC corporator atan lâk luh a ni.

Corporator lak luhna inkhawmah hian Aizawl mayor Lalrinenga Sailo-in Pathian thu a chhiar a; chumi zawhah Aizawl bawrhsap Lalhriatpuia'n Dr C Malsawmtluangi chu rinawmna thu tiamtirin AMC corporator atan a la lut a ni.

AMC General Election 2021-a Ward XIX aṭanga thlan tlin Baryl Vanneih­sangi chu kum 2023 khan MLA atan thlan tlin a nih avangin AMC-a corporator a nihna a chawlhsan a; chuvang chuan June 25, 2024 Ward XIX-ah by-election neih a ni a, ZPM candidate Dr C Malsawmtluangi thlan tlin a ni.

AMC-ah hian corporator 10 neitu MNF party an sorkar mek a; ZPM-in corporator paruk neiin, Congress party-in corporator pahnih an nei mek. Ward VI-ah bialtu corporator a thih avangin by-election neih leh a ngai dawn bawk.