ZORO-in Assam police an dem

Zo Re-Unification Organisation (ZORO) chuan thuchhuah siamin, Cachar district, Assam-a Hmar ṭhalai pathumte Assam police-te'n lemchanna hmanga mana July 16, 2024-a an that chu an dem thu an tarlang.

ZORO chuan, "Zo fapui Hmar ṭhalai pathumte Cachar Assam police-te'n lemchanna hmanga mana râwng taka an that mai hi kan dem hle. Hemi chungchanga kan unaute'n an thlavâng hauha hma an lakna zawng zawng hi kan thlâwp tlat a, Assam sorkara an thil phût zawng zawng tihhlawhtlinsak turin Assam sorkar kan phût tlat a ni," an ti.

ZORO chuan, July 21, 2024-a The Tripura Tribal Areas Autonomous District Council (TTAADC)-in sub-zonal development officer hna lâkna tur examination a buatsaihah, zawhna 75-naa, 'Sikam' tih chu Tripura state-ah tute hnam nge tih zawhna a siama chhanna zingah 'Halam-Kuki' tih a hmang chu pawi an tih thu an tarlang a, "Sikam tih hi Tripura-ah chuan ṭawngkam mawi lo, hnam inhmuhsitna ṭawngkam, hnam mâwl, mi thah chíng, hring-ei hnam tihna a ni," an ti a; zawhna siam dan chu Zo fate min hmuhsitnaa an ngaih thu leh Tripura sorkar chu ngaihdam dil tura an phût thu an tarlang.