Ration card paih chhan sawifiah

Food, Civil Supplies and Consumer Affairs minister B Lalchhanzova hoin nimin khan a pisaah Zomuantlang khuaa mi ṭhenkhatte ration card paih chungchang sawiho a ni a; ZPM General Headquarters hruaitu te, MZP hruaitute leh Mizo Convention (Youth Wing), Tripura aiawhte an tel.

ZPM chuan, Zomuantlanga ration card-te chu kum 2022 aṭangin endik a ni a, mitthi leh document fel lote paih a ni nual tawh tih an tarlang a, "Tun hnaia chhungkaw 80 dawn paih anga mi ṭhenkhatin an sawi hi a dik lo. Ration card hi computerise a nih tak avangin card a neih kawp (double) theih loh a, tuna ration card paihsak tak chhungkaw 13-te hi Tripura lama card nei an ni a, Mizoram nen card a neih double theih tawh loh avangin paih an ni," an ti.

Zomuantlanga ration card paih chungchangah hian Supply Minister hoin ZPM leh MZP hruaitute'n a hmunah endik tura kal leh an tum thu an tarlang bawk.