Adviser to CM-in minister pahnih a kâwm

Adviser to chief minister (Hand Holding) Dr KC Lalmalsawmzauva chuan July 22, Thawhṭanni khan Railways minister V Somanna leh Civil Aviation minister Murlidhar Mohol-te New Delhi-ah a kâwm a; Mizoram mamawhte a sawipui.

Dr KC Lalmalsawmzaua hian Railways minister V Somanna hnenah Mizoram thlai tharte rêl hmanga tláwm zawka thawn chhuah a nih theihna tura rawtna a thlen a; V Somanna chuan, sorkar laipui scheme Kisan Train a tàwp tak avangin Mizoram thlai tharte chu Bairabi aṭangin parcel van hmanga phai lama thawn theih a beisei thu a lo hrilh.

Adviser to CM hian Civil Aviation minister Murlidhar Mohol chu a pisaah a hmu a, thlai leh thei chhe awlsam chite thlawhna hmanga man tláwm zawka thawn chhuah theih dan tur a thlen a; Chief Minister DO letter a pe nghal bawk.

Dr KC Malsawmzauva hian Civil Aviation secretary Vumlunmang Vualnam a hmu bawk a; Krishi Udhan 2.0 ṭangkai zawka kalpui theih dan tur leh Lengpui Airport kaltlanga Mizoram thlai leh thei thar zinga chhe hma chite thawn chhuahna zung zung theih dan tur an sawi dun a ni.

Thlai thar thawn chhuah lama hma latu lian APEDA chairman Abhishek Dev pawh KC Lalmalsawmzauva chuan a hmu a; Mizoramin sawhthing tam tak a thar dawn avangin a hralhna lama harsatna awm thei leh a sutkian dan turte a sawipui. Abhishek Dev chuan, sawhthing sawngbawlna atan common facility centre tur rawtna chu ṭha a tih thu sawiin, detailed project report thehlut turin a lo ràwn a ni.