KHAWTHLIR

Stop Diarrhoea Campaign ṭan

PHE department Hnahthial WATSAN Division bultumin nimin khan Hnahthial district-ah kawṭhalo tihtawp beihpui thlakna, ṭan a ni a, district bawrhsap Rita Lalnunmawii Pachuau-in a hawng. Hnahthial medical officer Dr Zosangliani leh district child protection officer LT Rose Mary Hnamte ten kawṭhalo inkai darh dan leh inven dan an sawifiah a ni.

Officer training zo

Mizoram Combined Civil Services Probationers, 2023-a tling MCS, MFAS leh MIS probationary officer-te chuan June 10, 2024 aṭanga an neih tawh foundation training chu nimin khan an zo. Foundation training khârna inkhawm hi Administrative Training Institute-ah neih a ni a, officer tharte chu hriatrengna leh thilpek hlan an ni. Training hi MCS probationary officer ho tan August 6, 2024 thleng neih chhunzawm a ni thung.

Hmeichhia/naupang venhimna dan zirtir

Women & Child Development hnuaia Hub for Empowerment of Women chuan nimin khan Mamit High School-ah zirlaite pualin hmeichhia leh naupangte venhimna dan inzirtirna hun an buatsaih. Gender specialist C Lalremruati'n inchhungkhura hmeichhiate chunga hleilenna laka venhimna dan a sawi a; protection officer R Lalhriatpuii'n hmeichhe naupangte hursualna laka venhimna dan sawiin, MCAB hotu Joseph Rosailova'n sum vawn leh enkawl dan a zirtir bawk.

Home 3 tlawh

Social Welfare & Tribal Affairs, Women & Child Development minister Lalrinpuii chuan nimin khan Aizawl khawpuia naupang enkawlna home pathum a tlawh a, thawktute leh home-a awm naupangte a kâwm. Minister humsual dai naupangte chu nun bul ṭan ṭha leh tura chahin, nunbul tan tha leh turin tlai luat a awm loh thu a hrilh a, "Nakin zelah in nun in siamṭhat a, Pathian leh hotute thu in awih chuan ram hruaitu thlengin in la ni thei," a ti a, home pathum hotute hnenah ṭanpuina pawisa a hlan a ni.