Sorkarin MLA hluite MR bill Rs.13,75,866 a batsak mek

Mizoram sorkar chuan kum 2013-chhunga MLA hlui leh an chhungte mi 30-te damdawia an inenkawlna senso zinga Rs. 13,75,866 a la batsak mek. Hetih lai hian, MLA ni lai zingah pathumin medical bill an la tawh a, mi paliin an chhungte bill an laksak thung.

RTI Act hmanga MLA ni lai leh MLA hluite leh an chhungte damdawia inenkawlna senso chungchang zawhna chhannaa a lan danin, kum 2013-14 chhunga MLA hlui leh an chhungte'n damdawia inenkawlna atana an hman tawh chu Rs. 33,35,425 a ni a; tun thlenga pawisa pek chhuah tawh chu Rs. 19,59,559 a ni. Pawisa la batsakte chu pek chhuah tura hmalak mek a nih thu an tarlang.
MLA hlui, medical reim­burse­ment latute zinga a tam zawk chu Mizoram pâwnah kal loin, Mizorama damdawi-in hrang hrangah an inenkawl a; phai damdawi-in hrang hrang - Medanta (Gurgoan), Medica Superspeciality Hospital (Kolkata), NEIGHRIMS (Shillong), TATA Hospital (Mumbai) leh Apollo Hospital (New Delhi) pantu an awm nual bawk.
MLA hlui, damdawia inenkawlna bill-tute zingah hian, mi pariatin cheng nuai khat chuang an hmang a; pawisa hmang tam ber chu J Kapṭhianga a ni a, Rs. 5,79,492 a hmang a, a hmang tlem ber KL Lianchia chuan Rs. 11,180 a hmang.
MLA ni laite zingah, kum 2013-14 chhunga anmahni leh an chhungte damdawia inenkawlna bill la tawh mi pasarih an awm.
Kal (kidney) ṭha lo vangin Kolasib bialtu MLA PC Zoram Sangliana chu phai damdawi-inah vawi 13 a lut tawh a, Aizawla damdawi-inah ṭum hnih a lut tawh bawk. PC Zoram Sangliana'n a inenkawlna senso bill a lak tawh zawng zawng chu Rs. 16,91,071 a ni.
Chalfilh bialtu MLA Dr Ngurdingliana chu phaiah ṭum hnih leh Aizawlah ṭum hnih a inenkawl tawh a, Rs. 2,01,120 a hmang tawh. Champhai South bialtu JH Roṭhuama chuan a inenkawlna atan Rs. 2,22,483 a hmang tawh bawk. Anni pathum chiah hi MLA ni lai mi 40 zinga anmahni inenkawlna atana pawisa la hmangte an ni.
MLA ni lai zingah, anmahni ni lo, an chhungte damdawia inenkawlna senso bill tawh mi pali an awm. MPC member Lalthanliana chuan a farnu enkawlna atan Rs. 7,19,787 a hmang tawh a, INC member T Sangkunga'n a nupui enkawlna atan Rs. 4,12,857 a hmang tawh a; MNF member Lalrinawma'n a nupui tan Rs. 31,685 leh INC member Lalrobiaka'n a nupui tan Rs. 14,774 an hmang tawh bawk.
MLA ni laite leh an chhungte damdawia an inenkawlna senso hi bill pek chhuah theih loh a awm lo a, an senso belhkhawm chu Rs. 32,93,777 a tling tawh a ni.