Khawthlir

Thisen pe
Ramthar Veng branch KṬP chuan an Rising Day pualin Inrinni khan Aizawl Civil Hospital-ah thisen unit 35 an pe a, a petute mipa 25 leh hmeichhia 10 an ni. Baktawng Venghlun branch KṬP pawhin an Diamond Jubilee lawm nan January 30, 2015 khan Synod Hospital-ah thisen unit 29 an pe a, a petute mipa 28 leh hmeichhia pakhat an ni.

Model village
Parliamentarty secretary KS Thanga chuan a bial, Aizawl South-III chhunga model village atan Sialsuk khua a thlang. KS Thanga hian January 30 khan Sialsuk YMA Inpuia inkhawmah Siaksuk khua chu a bial chhunga model village atan a thlan thu a puang a, Sialsuk khuaa party hrang hrang hruaitu, kohhran leh tlawmngai pawl hruaitute chu entawn tlaka Sialsuk siamna kawnga sorkar hmalakna ṭha taka ṭawiawm turin an ngen a ni.

Lei tlahniam en
DM&R minister C Ngunlianchunga chuan January 30, 2015 khan Khawzawl Vengthara lei tlahniam a tlawh a, siamṭhatna turin SDRF aṭangin cheng nuai 15 Champhai DC hnenah a hlan nghal. DM&R minister hi bialtu MLA Lalrinliana Sailo leh DM&R director Lalpeksanga ten an ṭawiawm a ni.

Lalzawna thi
Champhai Tlangsam khuaa kohhran pakhat, 'Lalzawna pawl' tia hriat dintu leh hun rei tak chhung hruaitu ni tawh Vanlalzawna (67) chu nimin zing dar 4:30 khan Greenwood Hospital-ah pneumonia vangin a thi a; a nupui Lalhmangaihi leh a fate a kalsan.

Law officer thar
Mizoram Public Service Commission chuan Law & Judicial department-a law officer/special officer lakna an buatsaih chu January 30, 2015 khan result a tichhuak. Law officer tur hian Annette Lalrinsangi, Dawrpui; Andrew Lalhruaitluanga, Luangmual leh, Bobita Lalhmingmawii, Chawlhhmunte an tling.

Mei zu man
Serchhip District Anti Tobacco Squad chuan Inrinni khan Serchhip bazarah squad drive an nei a, phal lohna hmuna mei zu mi 19 an man a, pawisa an chawitir nghal.