March 15 ral hmaa lo hâl turin hriattir

Mizoram sorkara Local Administration Department (LAD) chuan, Mizorama lo leh huan vahte chu March 15, 2015 hmaa hâl vek turin a hriattir.

March 15 ral hmaa lo hâl vek tura hriattirna hi LAD-in a chhuah a, district hrang hranga district local aministration officer-te chu an huam chhungah ṭheuh puangzar turin a ti.

LAD chuan, kumin ṭhálah ram tihkan a nih loh nan DLAO tinte leh khaw hrang hrang V/C-te chu khauh taka dan kengkawh turin a chah a; lo leh huan hâl tur nei zawng zawngte chu ram an tihkan loh nan ṭha taka meilam sial tur leh an lo hâl a kan zawh hma chuan haw san loa awm chilh turin a ti a ni.

LAD chuan, thupek zâwm loa ram tikângte chu V/C Court-in Rs. 500 a chawitir thei tih sawiin, V/C thu pawisa lote chungchang chu judicial judge hnenah thlen tur a nih thu a tarlang.

Sorkar chuan, VC-te chu an khua ṭheuhah tlawmngai pawlte leh khawtlang parâwnte nen Joint Committee din a, kângmei laka himna ngaihtuah turin an chah a; rama mei chhêmte timit zel tur te, meizûk tihhlum zel tur te, inah mei tihmit loa kalsan loh tur te, electric tithi (off) zel tur te, fimkhur taka gas hmang turtein mipuite an chah bawk.