Feb. 28 a tawp tur VC leh LC term March 31 thleng pawhsei a ni

Mizoram sorkar chuan district paruk - Aizawl, Lunglei, Serchhip, Champhai, Kolasib leh Mamit district-a village council 508 leh Aizawl khawpuia local council 82-te term chu March 31, 2015 thleng a pawtsei.

Tuna Mizoram district paruka VC leh LC term kal mek hi February 28, 2015-a tawp tur a ni a, mahse Mizoram sorkar chuan kumin March thla tawp thleng pawtseiin, pawhsei a nih thu hriattirna chu LAD leh UD&PA-te'n an chhuah a ni.

Mizoram State Election Commission aṭanga thu dawn danin, district paruka VC leh Aizawla LC inthlanna hi March thla tawp lamah buatsaih tum a ni. VC/LC inthlana hman tur electoral roll thar pawh January 30, 2015 aṭang khan ennawn leh siamṭhat hna ṭan a ni a, Assembly electoral roll chu Election Commission of India phal angin draft roll atan hman a ni.

Draft roll tlawhchhan hian electoral roll thar chu siam a ni dawn a, electoral roll thar, in­thlana hman tur chu February 16, 2015-ah tihchhuah a ni ang.

VC/LC inthlan dan tharah, candidate-te inhnuhdawh theih ni hnuhnung ber leh vote thlak ni inkarah ni 21 a tlak a ngaih avangin VC leh LC ding lai term chu pawh sei a ngai ta niin SEC hotute chuan an sawi.

Aizawl, Lunglei, Champhai, Kolasib, Ser­chhip leh Mamit district VC ding lai 508 bakah hian, kumina inthlanah hian V/C thar 36 siam belh remtih a ni a, V/C 544-ah inthlan a ni ang. Aizawla local council ding lai 82 bakah local council thar siam tura rem­tih tawh Tlangnuam Veng­tharahte inthlan tur a ni ang.