Myanmar-a remna palai Zorama a lo kîr

Myanmar sorkar leh hel pawl hrang hrang 17 intélkhawmte inkara remna palai hna thawktu, Zoramthanga, MNF president chu Myanmar leh New Delhi-ah chawlhkar hnih chuang a châm hnuah January 31 khan Aizawl a thleng. Zoramthanga chuan, an thlen chinah thil a kal tluan thu a sawi.

Zoramthanga hian Myanmar-a palai hna thawk turin January 11, 2015-ah Aizawl a chhuahsan a, January 12-ah Kolkata aṭangin Myanmar khawpui Rangoon-ah a lut. Myanmar-ah a tih tur angte a tih hnuah January 22-ah New Delhi-ah a lut a, January 31 khan Aizawlah a rawn haw leh a ni.

Zoramthanga hi Rangoon-ah Myanmar sorkara minister, 'peace talk’ changtu nen an inkâwm a; January 18-ah Bangkok, Thailand-ah lutin, Myanmar ram chhunga hel pawl hrang hrang hotute nen an inbe leh a ni. Myanmar sorkar leh hel pawl hotute nen an inkawm hnuah, New Delhi-ah lutin, January 23-ah Home Ministry-a national security adviser Ajit Kumar Doval hnenah palai hna a thawh dante a hrilh.

MNF president chuan, remna palai hna a thawhnaah an thlen chinah boruak ṭha viau mah se, bul an ṭan chauh avangin tih tur a la tam hle tih a sawi.

MNF party chuan, an president-in Myanmar-ah remna palai hna a thawk chu an chhuan thu an tarlang a, "Myanmar sorkar leh underground pawlte ngenna angin palai hna thawk turin a kal a ni. Ram dang buainaa palai hna thawk tura an rawn thur nalh mai hi Central sorkar leh ram dangte'n an rinzia tilangtu a ni," an ti.