Khawthlir
In kâng
Nizan dar 7 pelh hnu khan Mission Veng bazarah Lalkungi (L) in, Assam type a kâng a, bungrua chuh hman lohin a kâng ral. Thu dawn danin dawr paruk leh in, chhungkaw pathum luahlai a kang ral.
Dan loa khaw din
MZP headquarters, Lunglei hruaitute chuan tun hnai khan Tlabung chhhehvela Chakma khaw hrang hrang an tlawh kual a, hmun ṭhenkhatah Chakma-ten dan loin khua an din leh nual tawh tih an hmu chhuak. Lunglei MZP chuan, dan loa khaw dinte chu an en liam mai mai dawn lo a, a ṭul dan angin hma an la dawn tih an tarlang.
Kawng khâr dawn
Aizawl DC chuan thupek chhuahin, vawiin aṭang hian Sakawrtuichhun-Lungverh inkar kawng siam a nih dawn avangin, kawng hi zing dar 10 aṭanga tla dar 5 thleng khâr ṭhin a ni dawn tih a tarlang.
Gas tichingpen
MZP sub-hqrs, Kawnpui chuan January 31, 2015 zan khan Mualkhang leh Khamranga gas tihchingpen ṭhinna hmun an enfiah a, motor pangain gas an lo tichingpen lai an hmu a, Legal Metrology hotute hnenah an thlen. Gas tichingpentu an hmuh motor-te chu - NL-08 A-5148 (Mamit Mizofed ta tur), AS-24 6379 (Suakchhunga Gas ta tur), MZ-01 G-2085 (Suakchhunga), MZ-02 5616 (El Pee Gas Lunglei) leh AS-11 AC-5686 (Caravan Gas)-te an ni.
MPCY-in dem
MPC ṭhalaite chuan thuchhuah siamin, tun hnai thla khat chhungin Delhi-ah biak-in ṭum nga suasam a nih thu an tarlang a; Kristiante biak-in suasamtute chu mana hrem ngei an phût thu sawiin, "Sakhaw zalenna ram ni si, Kristiante nasa taka nêkchêp kan ni fo runthlak kan ti a, Democracy ram ropui tak, India hmel nasa takin a tibâl a ni," an ti.
Free clinic
Red Shield Division thupek angin, 457 Field Hospital chuan January 30-31, 2015 khan Lunglei DC complex-ah ex-servicemen leh an chhungte bakah, mipui mamawh zualte tan free medical camp an buatsaih. Camp-ah hian mi 700 chuang an inentir a, a thlawnin damdawi pek an ni.