Ṭhalaite hna thawh dan tur sawiho

Chief secretary Lalmalsawma hoin nimin khan CS conference hall-ah department hrang hrangte'n International Labour Organisation (ILO) leh United Nations Industrial Development Organization (UNIDO) hmanga Mizoram chhung leh páwna hna hrang hrang thawk thei tura ṭha­laite buatsaih dan tur an sawiho.

Meeting-ah hian Mizoram chhunga hna pêng hrang hrang atan thawktu inchhawr dan leh ram pawn thlenga hna thawk tura inthawn chhuahna kawngah inkaihhruaina dan mumal tak neih a hun tawh thu sawi lan a ni a; skill development atana vocational course leh training chi hrang hrang te, labour market dinhmun te, technology mamawhte sawiho a ni.

Meeting-ah hian, Mizorama mihring awm zat aṭanga 20% vel chu Mizoram pawn lam mi, hna thawka Mizorama awm an nih thu an sawi a; hnam dangin hna thawh tur an hmuh laiin Mizo ṭhalai tam takin thawh tur an hmuh loh chhan hrang hrang sawiho a ni.

ILO leh UNIDO hnuaiah ruahmanna mumal tak kalpui a nih theih nan Labour, Employ­ment and Industrial Training department, Higher & Technical Education department leh Mizoram Youth Commission-te chu a rang lama concept paper buatsaih tura tih an ni.