Post-a awm lo Officer-te sorkara thlen tum

Kolasib District MJA chuan, Kolasib district chhungah group A officer awm lohna a tam lutuk vangin mipuite'n harsatna an tawk ṭhin niin an tarlang a; Kolasib-a officer, an post-a awm lo ngun deuhte chu sorkarah thlen an tum.

Nimina MJA Kolasib District hruaitute ṭhukhawm chuan, Mamit district leh Kolasib district inkalpawhna tur, Bairabi Tlawng luia ABCI-in kum 2007 aṭanga lei an dawh tawh, tun thlenga zawh a la ni lo an ngaimawh thu sawiin, a hmunah kala enho leh an rel a; Kolasib Supply kudama buh­fai ching­pen thubuaia tun thlenga charge­sheet thehluh a la nih loh avang­in an ṭul anga hmalak an tum a ni.

Kolasib MJA-te chuan, sorkar hun pawimawhte district leh sub-division-ah tihhlawhtlin a ni lo fo chu ṭha lo an ti a, sorkarah thlen an rel a; Kolasib-a IPRO thi ta aiawh tur dah a la ni lo chu ṭha lo an tih avangin, a dang lama dah turin I&PR Minister-ah thlen an tum bawk.