Assembly Subject Committee-te'n Aizawla hmun pawimawhte an enfiah

Assembly Subject Committee-II member-te chuan nimin khan Tuikhuahtlanga PHE tuizem lian, Falkawna State Referral Hospital, Tuiriala bawlhhlawh paihna hmun, Aizawl Civil Hospital leh Dawrpui West-a B Darchhinga building-te an enfiah.

Subject Committee-II te hi an chairman T Sangkunga hoin an thawk chhuak a; member-te chu RL Pianmawia, PC Zoram Sangliana, NK Chakma, Vanlalzawma leh Lalruatkima te an ni. Mizoram Pollution Control Board chairman RC Thanga leh MPCB hotu dang te, Assembly-a officer-te leh Environment & Forests aiawhte'n an ṭawiawm bawk.

Subject Committee-II te hian an hmun tlawhahte hian thli luan dan te, bawlhhlawh paih leh sawngbawl dante an enfiah a, dan ang thlapin damdawi-in thli leh bawlhhlawhte sawngbawl a ni em tihte an enfiah a ni. An thil hmuh dante leh rawtna an neihte chu report-ah an ziak ang a, Assembly House-ah pharh a la ni ang.

Tuikhuahtlanga PHE tuizem lian an enfiahnaah, PHE engineer-te chuan tui chu in tlak a ni em tih ni tin an endik ziah thu an lo hrilh a, PHE tuizem lian chunga office aṭanga thli luan dan pawh an hrilhfiah a ni.

State Referral Hospital-ah chuan medical superintendent Dr Jane Ralte leh a thawhpuite'n Aizawl Civil Hospital, State Cancer Institute leh Kulikawn Hospital aṭanga bawlhhlawh (biomedical waste) hâl tura an dawnte incenerator-a an hal ral dante an lo hrilhfiah a ni.

Aizawl Civil Hospital-ah chuan medical superintendent Dr Rosangluaia leh a thawhpuite'n an lo dawngsawng a, damdawi-in bawlhhlawh leh thli an sawngbawl dan te, bawlhhlawh paihna leh an thli luan dante a hmuna kalin an enpui a ni.