Prasar Bharati CEO-in Larsap leh CM a kâwm

Prasar Bharati chief executive offi­cer (CEO) Jawhar Sir­car chuan nimin khan Governor Dr Aziz Qureshi leh chief minister Lal Than­hawla te a kâwm.

Jawhar Sircar chuan, All India Radio leh Door­darshan Kendra hmanga hmasawnna thawh dan kawng hrang hrang leh hma thar lak dan turte Larsap Dr Aziz Qureshi chu a hrilh.

Jawhar Sircar chuan, Mizote'n zaipawl ṭha tak tak an neih thu a sawi a; Kolkata-ah zaipawl kutpui huaihawt a tum thu sawiin, chutah chuan Mizoram aṭangin sap hla leh Mizo hla sa turin zaipawl 10 vel teltir tum a nih thu, Larsap chu a hrilh bawk.

Chief minister Lal Thanhawla nen a pisaa an inkawmnaah Prasar Bharati CEO chuan, AIR Aizawl programme chu ni khatah darkar 10 vel tal ni tura hmalak an tum thu a hrilh a; Prasar Bharati chu zau zawk leh rei zawka kalpui an duh thu a sawi.

Jawhar Sircar chuan, "Kan theih ang zelin kan ṭanpui ang che u. TV tower zawng zawng pawh hi FM radio ngaithla thei tura hmalak tum mek a ni a, hemi hmang hian hmun kilkhawr zawka chengte pawhin FM radio an ngaithla thei dawn a ni," a ti.

Chief minister chuan, radio leh DDK chu Mizoram chhung bakah, Myanmar leh Bangladesh-a chêng Mizo tam takin an ngaithla a, an en thu a sawi a, Bang­ladesh lam hawia tih­chhuahah fimkhur ṭha a tih thu Jawhar Sircar a hrilh.

Chief minister hi minis­ter Lalrinmawia Ralte-in a ṭawimawm a, Prasar Bharati CEO hi ADC(A) Sekhran, ADG (P&A) C Lalrosanga, ADG(E) MS Hansari, DE T Hynsenta leh DDE Tor Paul ten an ṭawiawm a ni.