Drug licence dilnaah khawtlang hruaitute hriatpuina a ngai dawn

Health minister Lal Thanzara chuan, damdawi zawrh leh hralh phalna, drugs licence diltute an awmna khua/venga local council, village council, YMA leh MHIP hriatpuina nen chauha pek a nih theih nan order chhuah a nih dawn thu a sawi.

Chanmari West branch YMA-in nimina an branch kum 25-na, Silver Jubilee an lawm a hmanpuinaah thu sawiin, Lal Thanzara chuan, Central YMA hruaitute'n drug licence pek chhuah danah chief minister an hmuh thu a sawi a, "YMA conference-in a tihtluk tawh angin drug license neitute hian an hman sual a reh deuh nan hetiang diltute hi branch YMA-te hriatpuina tel hian pek chhuah ṭhin sorkar hian ti tawh se tiin an ngen a ni," a ti.

Health minister chuan, chief minister hnena CYMA ngenna chungchangah, "Drug licence hi branch YMA bakah, VC/LC leh MHIP hriatpuina tel lo chuan pek chhuah a nih lohna atana order chhuah tura tih kan ni," a ti a; thu an hmuh ang hian drug licence pek chhuah danah hmalak mek a nih thu a sawi.

Lal Thanzara chuan YMA a awm chu Mizo tan vanneihthlak a tih thu sawiin, "YMA-in ram, hnam, kohhran leh khawtlang tana a thawh zawng zawngte hi a ropui hle a ni," a ti a; YMA-te ruihhlo dona kawnga an pên chhuak chu lawmawm a tih thu a sawi bawk.

Chanmari West branch YMA silver jubilee lawmna hi an president C Lalzarliana'n a kaihruai a, khual­zahawm, Lalbiakzuala, Central YMA president pawhin thu a sawi.

Chanmari West branch YMA hi Chanmari branch aṭanga indangin, February 1, 1990-ah din a ni a, tunah hian member 2,879 an awm mek a ni