Sorkara chhiah pek tur tihpun a ni 2013-14 chhunga chhiah Rs. 5,89,73,891

Land Revenue & Settlement department-in 'The Mizoram (Land Revenue) Act 2013' (Act of No 5 of 2013) a hman tak avangin kum kalta chhunga sorkara chhiah lut thahnem takin a pung. Kum 2013-14 chhunga revenue department-in chhiah chi hrang hrang a lak khawm chu Rs. 5,89,73,891 a tling.

Thu dawnnain a sawi danin, chhiah lakna dan thar hman a nih avang hian sorkar department ṭhenkhat chuan ram an neih zau avangin, chhiah an pek tur a pung nasa hle.
Industries department chuan Mizoram hmun hrang hrang 17-ah ram neiin, a vaia chhiah an pek tur zat chu Rs. 35,28,972 a ni a; AH&Vety department chuan Mizoram pumah hmun 66-ah ram neiin, chhiah an pek tur zat chu Rs. 26,21,992 a ni.
School Education department chuan hmun 343-ah ram an nei a, a vaia chhiah an pek tur zat chu Rs. 18,69,424 a ni a; hmun 343-ah ram an nei chunga an chhiah pek tur a tam lutuk loh chhan chu - an ram neih zawng zawng revenue department-ah an la chhinchhiah fel loh vang a ni.
Revenue department hian Mizoram pumah chhiah chi hrang hrang - Leiman (land revenue), Building Tax leh Zoram Chhiahte an khawn mek a; an dân bua a inziah angin February thla chhung khua leh veng tinah an khawn ang a, mahni venga pe lote tan March 1 aṭangin Revenue directorate-ah pek theih a ni ang.
Revenue department-a thawkte chuan, chhiahte hi mi tam takin office lamah pek tum mah se, tunah chuan thawktute chhiah lakna lehkha pawimawh leh ṭul hrang hrang kenga an chhuah ṭhin avangin office lamah pek theih a ni lo tih an sawi a; office-a pek tum rih lo turin mipuite an ngen a ni.
Revenue department hotute chuan, dân thar hnuaiah chhiah tihpun a nih avangin Leiman, Zoram Chhiah leh Building Tax aṭangtea an sum hmuh tur chu kum hmasa 2013-14 chhunga an hmuh lêt deuhthaw hmu tura an inngaih thu an sawi.
LR&S department hotute chuan, chhiah pek tur chu a huna pek mai a ṭhat thu leh nghah khâwl chi a nih loh thu an sawi a, "Dân thar hman a nih avangin kumina pe lote hian nakkumah chuan 20%-a pungin an pek a ngai tawh ang," an ti.
Revenue hotute chuan, sorkar ram tam takah land lease la siam fel loh a tam thu sawiin, "Land lease hi an neih hunah ram an luah ṭan aṭanga chhiah chawi tur chhût tho tur a nih avangin an chawi ṭeuh a ngaih phah dawn a, tihfel ran a pawimawh a ni," an ti a; kum hmasa lama chhiah hmuh an beisei zat an hmuh loh chhan chu - pe tura ngaihte'n an pek loh vang a nih thu an sawi bawk.
Aizawl district bikah chuan, kum 2013-14 khan Rs. 2,88,68,810 an hmu a, kuminah chuan nuai 510 vel hmuh an inbeisei a ni.