Khawthlir

In sak enfiah
Aizawl Municipal Council chairman Zarzoliana chuan nimin khan Rangvamuala Ch. Saprawnga Truck Terminus leh warehouse sak mek a hmunah a enfiah a; warehouse sak zawh hunah parking fee, bungraw dahna leh enkawlna fee lak a nih tur thu a sawi. Warehouse hi NextCom ten an sa a, a sak nan Rs. 2,81,30,000 ruahman a ni.

Ar notê sem
AH&Vety department chuan nimin khan Dampa bial leh Mamit biala NLUP-a ar vulh thlangtu mi 190 hnenah second phase third installment atan ar notê 50 zel leh a chaw man tur Rs. 8,000 ṭheuh an pe.

COTPA bawhzui
Champhai district Anti Tobacco squad-te chuan nimin khan Champhai bazarah squad drive neiin, COTPA bawh­chhia an awm leh awm loh an enfiah a, phal lohna hmuna mei zu leh dan bawhchhia man an nei lo.

Sericulture training hawng
Sericulture minister Dr BD Chakma chuan February 2 khan Sericulture directorate conference hall-ah ni sarih chhung awh tur Resources Development Programme a hawng. He programme hi sorkar laipuia Textiles Ministry hnuaia Central Silk Board ruahman a ni a, Mizorama Sericulture department officer 20-te training pek an ni.

BJP insawifiah
BJP, Mizoram Pradesh chuan thuchhuah siamin, V/C inthlanna turah BJP-in HPC(D)-te an thawhpui dawn ni âwma chief minister Lal Thanhawla'n a sawi chu thu dik lo leh belhchian dâwl lo a nih thu an tarlang a, "BJP leh HPC(D) ten inkawmna an la nei ngai lo," an ti.

SBI branch thar
Ngopa khuaa State Bank of India branch thar chu nimin khan Minister H Rohluna'n a hawng. SBI Ngopa branch hi Mizorama SBI branch 38-na a ni a, November 27, 21014-ah hna an thawk ṭan tawh a; a hawnna inkhawm hi Ngopa YMA Jubilee Hall-ah neih a ni.