Clean Mizoram Cycling Expedition vailiam

Mizorama faina beihpui thlakna chi khat atan, PC Ramengmawia leh Vanlallawmzuala, Mission Veng Youth Adventure Club-a mite chuan, Clean Mizoram Cycling Expedition an ṭan a, Aizawl Tennis Court bul aṭanga tlan tanin, thirsakawr hmangin Mizoram khawchhak lam khaw hrang hrang an fang kual ang. He cycling expedition hi PHE department nen thawkhoa buatsaih a ni.

Clean Mizoram Cycling Expedition-a fang turte pualin nimin chawhma dar 10 khan Aizawl Tennis Court bulah inkhawm tawi te neih a ni a, minister of state C. Ngunlianchunga'n a vai liam a ni.

C Ngunlianchunga chuan, Mission Veng Youth Adventure Club leh PHE department-te'n 'Clean Mizoram Cycling Expedition' an buatsaih chu ṭha a tih thu sawiin, "Faina hi kan vaia mawh a ni a, department mal chauh tihpuitlin theih a ni lo. Ram, khua leh veng angin hma kan lak a ngai a, kan mawhphurhna ṭheuh a ni," a ti a; faina beihpui thlak mek chuan thingtlang kilkhawr ber pawh thleng se a duh thu a sawi.

Inkhawmah hian CCDU director Ro­thanga'n PHE department-in faina chungchanga hma a lak dante a sawi a; Mission Veng Youth Adventure Club adviser Malsawmkima'n an inbuatsaih dan sawiin, PC Ramengmawia leh Vanlallawmzuala te hian thirsakawr hmangin Saiha thleng an kal tawh thu a sawi bawk.

Expedition-a kalte hian thirsakawr hmangin Aizawl-Seling-Serchhip-East Lungdar-Khawbung kawngah Rihdil thleng an tlân dawn a; haw lamah chuan Champhai-Khawzawl-Kawlkulh-Keifang kawngah an tlan thung ang. Kal lam leh haw lama an kalna kawng thui zawng chu km. 729 a ni.