Mission Venga in kâng hnatlangin senghawi

February 2, Thawhṭanni zana Mis­sion Veng bazara kangmei tuarte chhawmdawl hna vawiinah thawh a ni.

Mission veng YMA South Branch hruaitute hnen aṭanga thu dawn danin, in kâng neitute hi Lal Thanliana, H Rohmingthanga, Darbuangi, Thanglura, Rinawmi leh Tinkhumi, Mission Veng vek an ni a; Tinkhumi tih loh hi chuan anmahni'n an luah vek a ni.

Dawr kâng ral ta neitute chu - Baby Lalngaihzuali, Salem Veng (restaurant); Zohersanga, Mission Veng (bungbel dawr); Lalrinfeli, Kulikawn (bungbel dawr); Lalrintluanga, Thakthing (damdawi dawr); LalIndia, Republic Veng (insakna bungraw dawr) leh Chuauthangmawii, Mission Veng (second hand dawr)-te an ni.

In kâng chhe tate hi nimin khan Mission Veng khawtlangin hnatlangin an senghawi nghal a, veng ṭhenawm aṭangin mi ṭhahnem tak an thawk chhuak bawk. Vawiinah sak that hna thawkin hnatlan chhunzawm a ni ang.

Mizoram Synod pawhin in neitu chhungkaw paruk hnenah Rs. 10,000 ṭheuh leh dawr neitu mi paruk hnenah Rs. 6,000 ṭheuh a pe a, nimin khan Synod moderator Lalrinmawia'n a hlan a ni.

Mission Veng Local Council leh YMA South Branch-te chuan thuchhuah inṭâwm an siam a, chhanchhuah hna leh tanpui hna thawktu mi tlawmngai zawng zawng hnenah lawmthu an sawi.