Kum 5 chhunga cancer vei 5888, thi 3,137

Vawiin, February 4 hi cancer do ni, World Cancer Day a ni a, Health Minister hoin Aizawla Electric Veng YMA Hall-ah hman a ni ang. Report-a a lan danin, Mizoramah kum nga chhungin cancer vei thar mi 5,888 an awm a, cancer vanga thi mi 3,137 an awm bawk.

Non Communicable Diseases-a state nodal officer Dr Eric Zomawia'n a tarlan danin, National Cancer Registry Programme (NCRP) leh Mizoram Population Based Cancer Registry (PBCR) report hrang hrangin a tarlan dan chuan, India rama cancer registry 25 chuang awm tawh zingah Mizoram hi state chhunga mihring zat aṭanga tehin cancer vei tamna ber state a ni. Cancer rau rauah, Mizote zingah chuan pumpui, chuap, chaw kawng leh chhûl hmawr cancer-te a tam zual.

December 2014 thlenga Mizoram PBCR Report-in a tarlan danin, Mizoramah kum nga chhunga cancer vei thar mi 5,888 zinga 3,229 chu mipa an ni a, hmeichhia 2,659 an awm bawk. Kum 2010-2014 chhung veka cancer vanga thi mi 3,137 zingah mipa 1,847 leh hmeichhia 1,290 an awm.

Kum nga chhungin Mizoramah pumpui cancer mipa 750 leh hmeichhia 355, an vaiin 1,105 hmuhchhuah an ni a; chuap cancer mipa 436 leh hmeichhia 421, an vaiin mi 857 hmuh chhuah an ni. Chaw dáwt cancer 503 (mipa 427 leh hmeichhia 76), chhùl hmáwr cancer 364, hnute cancer 289 (mipa pali leh hmeichhia 285) kum nga chhungin hmuh chhuah a ni bawk.

World Cancer Day, February 4 hi Union for International Cancer Control (UICC)-in a puan anga hman zui a ni a, kumina thupui chu ‘Not beyond us’ (Cancer invenna leh enkawlna hi kan ban phakah a awm) tih a ni.