Sport minister-in hockey tournament a hawng
Mizorama infiamnaa intihsiakna upa ber pawla ngaih, Chawngkhuma Memorial Hockey Tournament chu nimin khan Baktawng khelmualah Sport minister Zodintluanga'n a hawng.
Zodintluanga chuan, kum 1935 aṭanga chhum lo chat loa hockey tournament an lo buatsaih tawh Chawngkhuma Memorial Hockey Tournament tun thlenga an la buatsaih zel chu ropui a tih thu sawiin, "Min tiphûr hle a, kum 80-a upa intihsiakna, pi leh pu aṭanga khawtlangin in lo tuipui hi a ropui hle a ni," a ti.
Sports minister chuan, CM Lal Thanhawla kaihhruaina hnuaiah Mizoram sorkarin ṭhalaite khawvel thar a siam mek thu sawiin, "Khawpui leh district headquarters lam hawiin kan hlawhtling mek a, thingtlang lam i hawi ve leh tawh ang u kan ti a, rei lo te chhungin India ramah hriat kan hlawh ta a ni," a ti a; Vision 2016 hnuaiah Rio Olympic-a Mizo ṭhalaite an tel ve theih nan ṭan lak mek a nih thu a sawi.
Chawngkhuma Memorial Hockey Tournament hi a tirah chuan, kum 1935 khan Inkhelhpui tiin an buatsaih ṭan a, kum 1955 aṭang khan trophy-ah istiri an hmang a; tun thlenga la buatsaih zelin, kumina an buatsaih hi a kum 80-na a ni. Kumina tournament-ah hian mipa team 20, hmeichhe team paruk, veteran team pali, U-16 boys team pali leh hmeichhe team pathum, an vaiin team 37 an tel a ni.