Zirlai pawlte'n inrûkbo an dem

Zirlai pawl pahnih - MZP leh MSU-te chuan thuchhuah siamin, February 2, 2015 zing kara Bru misual leh National Liberation Front of Tripura (NLFT) ṭangkawp nia hriatte'n Dampa ngawa Chikha leh Tuipuibari inkara BRTF hna thawk Hakum Singh leh Mohammed Buiju te an rubo chu a dem tak zet thu an tarlang a; thu delhkilh awm loa a rang thei ang bera chhuah turin an phût.

MZP chuan, Central leh Mizo­ram sorkarte'n mahni duhthu ngeia Mizoram chhuahsantu Bru-te Mizorama la lêt tura hmalakna a kalpui apiangin Bru-te'n mi an rubo ṭhin niin an sawi a, "Mizorama kîr an duh tak tak lohzia a tilang chiang hle," an ti a; Bru-te lak kir hna thawh leh a nih huna Mizorama lêt duh lote chu Mizoram electoral roll aṭanga paih ngei an duh thu an sawi.

MSU chuan, Bru hel pawl nia hriatte'n mi pahnih an rûkbote tlanchhuahna sum an phût a nih pawhin, pe lo turin sorkar leh hmun dang an beiseina turte a ngen a; Mizoramah ram bial khatah inrûkbona a thleng fo chu khamawm an tih thu sawiin, sorkar chu na zawka a chêt a hun tawha an ngaih thu an sawi bawk.