Vanglaini Chhuichianna Kawngpui a ni, lirthei riahna hmun a ni lo!

Dan ang chuan kawngpuia lirthei riah hi phal a ni lo. He dan hi nasa taka palzut a ni a, kawngpuia lirthei riah ṭhin tam tak an awm a, harsatna thlentu lian tak an ni ta. Aizawla veng ṭhenkhata khawtlang mipuite chuan an veng huam chhung kawngpuia lirthei riah an remti lo a, kawngpuia lirthei riah khapna veng an pung zel.

A tirah harsa deuhin lang mah se, khawtlang hruaitute remruatna hian zawm a hlawh zel a, a nawmzia leh a ṭhatzia teltute chu khawtlang mipui an ni. Lirtheia kal a nuam tawh a, kea kal thlengin a nawm phah a, lirthei dahna in (garage) nei lote pawhin an zawng hmu ta zel a, tunah chuan Aizawla veng entawntlak bikte chuan zana lirthei riah ṭhin chu an tibo ta.

ZOTLANG

C Lalzamlova, Local Council chairman chuan kum 2010 aṭangin zan lama kawng sira lirthei riah an phal loh thu an chhuah a, anni hi Aizawl Veng chhunga hetianga hma la hmasa ber veng an ni.

Sanitation rules an siam a, he mi pêng pakhat atan hian kawngpui sira zan riaka motor dah an phal lo. A tirah mi pahnih/pathum an man a, Rs 50 zel an chawitir a; mahse chawitir ngai khawpa dahlui an awm belh tawh lo a, thu an awih tlang viau tih C Lalzamlova chuan a sawi.

Tun hma chuan zanah kawng dungah motor dah an awm ṭhin a, kawngpui a lian vak lo nen a hnawksak ṭhin hle. Dan an zam takah chuan motor nei si, parking nei lote chu veng chhunga tualzawl nei zau deuhte hnenah dilsakin lirthei ke pali nei tan Rs 500 leh two wheeler tan Rs 300 chawi tur angin Local council hruaitu lamin an biaksak. Hetianga dilsak ngai hi an tam lem loa, tunah chuan in sa tharte pawhin garage tur an ruahman tel deuh zel tawh. Chhungkaw tam takin an in chhung tidanglamin garage an siam thar a, veng chhung mipuite pawhin nuam an tiin chhunzawm zel an duh.

Laklawh thil avanga zan khat lek dah tur ang chi te, chhiatna thil avanga lirthei rawn dah zawk ngaite leh mikhual motor ang chite chuan Local Council lamah an dil ṭhin. A tirah two wheeler-te pawh park phal loh an ti a, mahse tunah chuan two wheeler-te chu ngaihnathiamna an nei tawh tih a sawi. Lirthei mai ni lo in sakna bungruate pawh kawng sirah hian darkar 24 aia rei dah an phal lo a, kawngpui an duat thiam.

C Lalzamlova chuan "Kan vengin kan tih theih chuan Aizawl khaw pumah hian a tih theih ang tih ka ring. Mipuite pawhin an thlawp em em a, a zuzi leh ang tih an hlau zawk a ni. Zan lama chhiat tawk an awmte hian, veng dang aṭanga lo kalte pawhin motor dahna tur awm zel thei chu nuam an ti hle a ni," a ti.

COLLEGE VENG

Anni veng hian March, 2014 aṭang khan veng chhunga kawngpui sirah zan riaka motor dah an khap. Lirthei nei si, a dahna tur nei lo chu garage an neih hmain khelmualah (basketball court/volleyball court) an lirthei chu dah tura tih an ni. Chungho motor-ah chuan lehkha an tar a, zana dah ve lo an awm chuan lehkha an pe leh a, a zawm lo an awm chuan Rs 100 an chawitir. Kawngsira an dah lui a nih chuan zan khatah Rs 200 an chawitir leh a, tilui an awm zel (a vawi thumna) a nih chuan Rs 500 an chawi ang tiin thu an dah a, mahse Rs 500 chawi an la awm lo. Rs 200 chawi hi chu 7/8 vel an awm hman tih College Veng Local Council treasurer HT Para chuan a sawi.

Zanah hian dar 10/11 hnuah Local Council-te hian veng chhung an fang ṭhin a, kawngpuia lirthei dah an tlem sawt hle tih an sawi. Damlohna thil leh emergency thilah chuan Local Council hotute hnenah an sawi a, ngaithiam an ni ṭhin. Mikhual an awm a nih pawhin an thlenna ten an dan siam chu hrilh mai turin an chah a, mikhual motor chu khelmualah chuan dah turin an ti ṭhin.

ELECTRIC VENG

Electric Veng Local Council & NGOs Coordination Committee-te chuan December 15,2014 aṭang khan an veng kawngpui dunga lirthei riah an phal lo. A hawn zan hian zan tir leh zan rei hnuah Traffic Police-te leh khawtlang hruaitute'n veng chhung kawngpui an fang a, two wheeler 22 leh LMV pariat an man.

August, 2014 khan in tinah lirthei neitute garage nei vek tura hriattirna leh ngenna circular an lo sem chhuak tawh a. Veng chhung chanchinbu issue tinah ziah ṭhin a nih bak h information mike aṭangin an au bawk. Heng avang hian Electric Veng khawtlang hruaitute chuan an thu zawm tum tan chuan hun an inpe tam tawka an hriat thu an sawi.

Road Protection Squad-te chuan kar khatah zan thumte duty-in zan reiah veng chhung an fang kual ṭhin a, zan hmasa ber bak chu man ngai an awm meuh lo. Thu awih lo fal an awm chuan an lirthei hnuh sawn sak thlenga hma lak an inpeih. Veng chhung mipui aṭangin thlawpna thu leh lawmthu sawina khawtlang hruaitute chuan an dawng tam hle a, chhungkaw ṭhahnem takin garage an siam thar nghe nghe.

Road Protection Squad te hian an vawi khat manah Rs 100, vawi hnihnaah Rs 500, vawi thumnaah 1000 chawitir turin an rel a; veng/khaw khaw dang atanga lokalte pawh an dan hman chu zawm turin an ti. Duty-te hi zan dar 10-ah an kal kual a, zanlai dar 12 velah an kual nawn leh ṭhin. Veng pawn aṭanga Electric Venga lengte chu an lirtheiah biak theihna tur phone number ziaka dah lang ṭhin turin an ngen.

Road Protection Squad Secretary MS Dawngliana chuan, "Lirthei neitute hi sorkara garage nei anga inziaklut vek an ni. Kawngpuia riah ṭhin tura sorkar-in a register sak an nih loh avangin kan hmalaknaah hian khawtlang hruaitute chu an tim lo" a ti.Road Protection Squad Secretary chuan, "Hman deuh khan Electric Venga Church Street-a electric banah kangmei a chhuak a, Fire dept koh an ni a, mahse kawng sira motor riah an tam vangin a hmun a thleng thei lo a, ṭhelh hman a ni lo. Kha khan harhna min pe a; chhiatna thleng palh theiah kan buai phah fothei tih kan hriat avangin hetiang hian kan kal ta a ni," tiin a sawi.

BETHLEHEM VENG

Bethlehem Veng Branch YMA president J Lalthutiama chuan kum 2014 kum tir aṭang khan an vengah Road Protection Committee din a nih thu a sawi. Local council president chu chairman a ni a, YMA president chu vice chairman a ni. Zan tin dar 11-ah an round ṭhin a, zan dar 2 thlen changtepawh an ngah ṭhin tih a sawi.

Traffic Police-te nen khawlai an fang a, zan riaka motor dah an man chuan Traffic Police ten lehkha an bel a, Traffic Police dan angin an chawitir mai ṭhin. Garage nei lote chuan an theih ang angin an ngaihtuah chawp a, veng dangah te pawh an dah ṭhin. A tirah hautak mah se tunah chuan man ngai an awm meuh tawh lo a, mipuite pawhin an thlawp ṭha hle tih Bethlehem Veng Branch YMA president chuan a sawi.

Veng dang khawtlang hruaitute pawhin Bethlehem Veng kalphung hi an zawt fo a, veng dang pawhin an tih vek theih a rin thu J Lalthutiama chuan sawi. Laklawh thil, zing kara zin chhuak turte leh mikhualte chuan kawngpuia lirthei hun phalna khawtlang hruaitute hnenah an dil a, hriatthiam an ni ṭhin.

MISSION VENGTHLANG

Local Council Chairman Lalhming­mawia sawi danin kum 2013 tawp lam aṭang khan an veng chhungah zan riakin kawng sira motor dah an phal lo. Mipuite hriat turin tlangauin an puang a, veng chanchinbuah an tarlang bawk a, kawng sira dahlui man an awm chuan Rs 200 chawitir an ni. Mipuite thu an awih a, garage an siam chawp nghal chuk chuk a, veng chhung kawngpui a thawl nuam hle.

Rokhawlhna bik a awm nih chuan hruaitute hnenah hrilh lawk turin an ngen a, an hmalakna hi a hlawhtling hle tih Local Council Chairman chuan a sawi. Veng chhunga kangmei leh chhiatna thleng palha ṭanpuitu kalna tur dâl a ni ṭhin chu an ngaimawh a, sorkarin ti tura an hrilh hmain veng chhungin he thil hi an rel tawh niin ocal Council Chairman chuan a sawi.

TRAFFIC HOTUTE

Traffic SP Lallianmawia sawi danin Traffic Police-te chu Aizawl khawpui chhunga local council hote nen inhmukhawmin an veng chhung kawngpuia lirthei riah ṭhinte chu riahtir tawh lo tura ti turin an ngen tawh a, lehkhain an ngen nawn leh bawk. Local Council ṭhenkhat, an veng chhunga lirthei riah ṭhin tihtawp tuma ṭan latute'n harsatna an tawhin an pun fo a, Zotlang leh Bethlehem Vengin an pun fo ṭhin tih a sawi.

MIZORAM FIRE &

EMERGENCY SERVICES

SP C Lalthanmawia sawi danin, kawng sira motor riah an awm hian in kang a awmin chhanchhuaktute an khawtlai phah ṭhin a. Kawng sira motor inhung an awm ṭeuh vang hian kangṭhelh motor insiksawi hun chhung a rei. Kawngsira lirthei hun hian chhanchhuahna a tikhaihlak nasa thei hle a ni.

In vengah kang ṭhelh ngai awm ta se, ṭan­puitu tur lirthei lo kal chu tute'n emaw dan bawhchhiaa kawngpuia lirthei an hun avangin khawtlai ta se, kangmei tuartu chhungkaw tan a va thinurthlak dawn em!