Lengpui Airport chei ṭhat thubuaiah Lokayukta-in CM chhànna an hmu; ACB-ah hriat belh duh an neih an zawt
Mizoram Lokayukta chuan Lengpui Airport chei ṭhat chungchanga eirua chief minister hlui Zoramthanga puh a nihnaah chief minister Lalduhoma hnen aṭangin chhànna an dawng tawh. Hetih lai hian, Lokayukta hian he thubuai chhuitu Anti Corruption Bureau (ACB)-ah hriat belh duh an neihte an zawt leh mek.
Lokayukta chuan Lengpui Airport chei ṭhat chungchanga CM Lalduhoma'n thuthar thehdarhtute a kawmnaa a sawite chu hriat chian lehzual an duh a, CM Personal Secretary kaltlangin January 19, 2024 khan an zawtfiah. Hun eng emaw chen CM aṭanga chhanna an dawn loh hnuah Lokayukta chuan chhanna an dawng tawh a ni.
Chief Minister aṭanga chhanna an dawn hnuah Lokayukta chuan thubuai chhuitu ACB-ah hriat belh duh an neihte an zawt leh a, ACB aṭangin chhanna an la dawng lo. ACB aṭanga chhanna an dawn hunah thubuai kalpui zel a nih dan tur ngaihtuah leh a ni ang.
Mizoram First Movement (MFM) chuan Lengpui Airport tihchangtlunnaah dan bawhchhiatna a awmah ngaiin March 14, 2022 khan Lokayukta-ah complaint an thehlut a, a mawhphurtu bera an puh chu a hun laia PWD enkawltu chief minister Zoramthanga a ni.
Lokayukta chuan GAD thu a zawhfiah hnuah Anti Corruption Bureau (ACB) chu zir chiang turin a ti a; ACB report thehluhah duhkhawp loh an neih avangin Lokayukta chuan ACB chu zawhna a zawt leh. ACB-in an chhàn leh hnuah hearing (sawihona leh inzawhfiahna) buatsaih a ni.
CM Lalduhoma chuan, Lengpui Airport chei ṭhat chungchang hi January 6, 2024-a CMO conference hall-a press conference a neihnaah a sawi chhuak a; chu a thu sawi chu Lokayukta chuan ngai pawimawhin, Chief Minister PS hnenah January 19, 2024 khan a zawtfiah a ni.