Damdawi bawlhhlawh sawngbawlna din thar UDPA Minister-in a hawng
Urban Development and Poverty Alleviation (UDPA) minister K Sapdanga chuan nimin khan Tuiriala bawlhhlawh sawngbawlna, Solid Waste Management Centre (SWMC)-a khawl hmanga damdawi bawlhhlawh sawngbawlna - Common Bio Medical Waste Treatment Plant a hawng.
Common Bio Medical Waste Treatment Plant hi Aizawl Smart City Ltd leh Mizoram Pollution Control Board hmalakna din a ni a; damdawi-in, clinic leh healthcare facility-a damdawi lam kaihhnawih bawlhhlawh (medical waste) sawngbawlna tur niin, Bio Medical Waste Management Rules, 2016-in a phût anga din a ni. BL Engineering leh GI Infotech-te'n joint venture-in an thawk.
Bio Medical Waste Treatment Plant thar hian Aizawl, Kolasib, Serchhip, Mamit leh Saitual district-te a huam a; district pangaa damdawi-in, clinic leh healthcare facility tina medical waste chu a khawn khawmtu bik lirtheiin a la khawm ang a, Tuiriala sawngbawl turin an phur khawm ṭhin ang.
Minister K Sapdanga chuan, damdawi bawlhhlawh sâwngbàwlna bik tur Mizoramin a nei ta chu state pum tan a hlut thu a sawi a, "UDPA department leh Smart City lama kan hotute thawhrimna leh inpekna a ropui a, he hmun hi mipui tan ṭangkai tak a nih ngei ka beisei," a ti.
Bawlhhlawh sawngbawlna a changkan zel angin mipui pawh bawlhhlawh paih danah an changkan zel a beisei thu sawiin K Sapdanga chuan, "Aizawl khawpui hi khawpui fai a nih theih hun kan nghakhlel tlang hle a ni," a ti a; faina lama hmasawnna atana thil ṭangkai tak tur khawl ropui tak hman theiha peih a ni chu lawmawm a tih thu a sawi.
Sorkar thuchhhuah tarlan danin, Common Bio Medical Waste Treatment Plant-ah hian damdawi-in bawlhhlawh sawngbawlna khawl chi li - bawlhhlawh hlauhawm leh hri kaite hâl raltu khawl, bawlhhlawh tihthianghlimna khawl, bawlhhlawh ṭhial sawmtu khawl leh tui leh damdawi thli tithianghlimtu khawlte a awm.
Bawlhhlawh phurtu lirtheite chu silfai nghal zel tur an nih avangin treatment plant-ah hian silfaina hmun a awm nghal a, bawlhhlawh dah khawmna hmun bik siam a ni. Kawlphetha khaihlak chánga khawl châwm thei tur generator 250KVA dah a ni bawk.
Common Bio Medical Waste Treatment Plant siam nan cheng vbc. 9.71 hman a ni a, project atan hian Ministry of Environment, Forest and Climate Change chuan nuai 200 a pe.
Plant hawnnaah hian Aizawl mayor Lalrinenga Sailo, UDPA secretary Lalmalsawma Pachuau, HFW secre-tary Sangchhin Chinzah te, UDPA department, AMC leh Mizoram Pollution Control Board hotute an tel a ni.
Health & Family Welfare department-in July 22, 2024-a thuchhuah a siam angin, Aizawl Smart City Ltd chuan AMC-ah thla hnih chhung enchhina (trial run) a kalpui dawn a; chumi rual chuan HFW department-in Saitual district-ah thla hnih chhung trial run a kalpui dawn bawk.