Aizawl DC leh MJA hruaitute inkâwm

Aizawl district bawrhsap Lalhriatpuia chuan nimin khan a pisaah MJA Gen.Hrs hruaitute thingpui a inpui a; thil pawimawh hrang hrang sawipuiin, leimin laka himna turin tui luankawr ṭha taka siam a ṭul thu a sawi.

Lalhriatpuia chuan, Aizawl district chu Mizorama district lian ber a nih avangin mawhphurhna a sang tih sawiin, "Tun hnaiah hmun hrang hranga khuarel chhiatna thleng vangin mawhphurhna a sang zual a, chawlh pawh awm mang loin kan vir buai hle," a ti a; mipui duhthusam ang phâk dawn lo mah se, theihtawp an chhuah tih a sawi a ni.

Leimin tur venna atana tarpauline hmanga khuh chu invenna tluan­tling a ni lo tih sawiin Lalhriat­puia chuan, "Chhiatna, a bikin leimin zel tur ven kawngah nasa taka hmalak a ngai a, tuihâwk luankawr leh tuichhe paihna mumal taka siam tura hmalak a ṭul a, hei hi building by laws pawhin a dah pawimawh. In sa tawh leh sa thar tur reng rengin tuichhe paihna an nei lo a nih chuan danin an ṭhen­awmte ram kaltlanga tui luankawr siam a phal a, hei hi ram neitute'n an hriat chian a ṭul," a ti.

Aizawl Bawrhsap chuan, Mizoram hmun hrang hrangah chhiatna a thleng ṭhin tih sawiin, "Mizorama leimin tam tak chu mihring siam chawp niin a lang. Vawk vulhna leh tuihâwk luankawr fel lo vanga harsatna thleng a ni ṭhin," a ti a; tunhmaa chhiatna a thlen chánga thuneitute ṭhutkhawm phawt hnua a hmun tlawh ṭhin chu her danglamin, ṭhutkhawm hmain a hmun an tlawh hmasak tawh ṭhin thu leh, chhiatna a thlen hunah chauh hma la loin, a thlen loh nan hmalak chu an duh dan a nih thu a sawi.

Inkawmhonaah hian Aizawl DC pisa leh MJA/chanchinbumite ṭha zawka thawhho dan turte an sawiho a ni.