Dante hi harsatna leh hmasawnna tur dâltuah hman tur a ni lo - CM Duhoma

Mizoram State Board for Wildlife (SBWL) chu an chairman Lalduhoma, chief minister kaihhruaiin nimin khan CMO conference hall-ah an ṭhukhawm. Chief Minister chuan, dante chu mipui hmasawnna leh hamṭhatna atana siam a nih avangin harsatna leh hmasawnna tur dâltuah hman tur a nih loh thu a sawi.

Chief Minister chuan, tun hnaia Delhi-a a zinnaah Mizoram State Compensatory Afforestation Fund Management and Planning Authority (Mizoram CAMPA) chairman a nih thu Union Minister of Environment & Forest-in a lo hrilh tih a sawi a, "Mizorama a buaipuitu kan official-te'n kha leh chen chairman ka nih thu min hrilh lo kha a mak ka ti hle," a ti.

Union Minister-in Mizorama forest clearance fel lo vanga hmasawnna hnathawh theih lohte (pending list) a lo pe tih sawiin Lalduhoma chuan, "Heng kan harsatnate min chinfelsak hi a duh a ni. Kan ram tana hmasawnna tur, ram mipuite'n ṭangkai taka kan hman tur hmalakna vek an ni. Dan hi mipuite hmasawnna leh hamṭhatna atan siam a ni a, an harsatna leh hmasawnna tur dâltuah kan hmang tur a ni lo," a ti a; hmasawnna hnathawhte a hlawhtlin theih nan ṭanrual tur a ni tih a sawi.

Ṭhutkhawmah hian Standing Commi­ttee of State Board of Wildlife din te, Aizawl Zoological Park luh man leh wildlife victim-te ralna (ex-gratia) tihsan te, kum 2021-a saiin a tihhlum Hnianghniangi zangna­dawmna dilna te, Zorinpui-Longmasu inkara kawngpui thar (NH-502A) laih tura ruahman leh, Sairang-Tuipuibari inkar kawngpuia lei dawh ṭhat ngai pahnih chungchang te, Phawngpui National Park leh Ngengpui Wildlife Sanctuary enkawl zel dan turte sawiho a ni.

Hun pawimawh laia Wildlife Zero Tolerance Drive neih te, airgun leh a kaihhnawih khuahkhirhna nasa zawka kalpui te, ramsa chhanchhuahte felfai zawka enkawl dan tur te, Mizorama mumal leh felfai taka nungchate hming thliartu tur Nomenclature Committee din tawh, hma la la lo tuai thar leh chungchang leh, hmun pawimawh bika ramsate'n kawngpui an kânna tur siamte sawiho a ni bawk.

Meeting-ah hian Environment Forest & Climate Change minister Lalthansanga, PWD minister Vanlalhlana, adviser to CM TBC Lalvenchhunga leh MLA Lt.Col. Clement Lalhmingthanga bakah Board member-te an tel.