Mizoram loneitute aṭangin buhhûm lei theih dan tur zir chian mek a ni - Agriculture Minister
Agriculture and Farmers Welfare department chuan nimin khan Agriculture conference hall-ah leilet neitute buh thar leisakna tura hmalakna, 'Paddy Procurement Programme' chungchang inhrilhfiahna an buatsaih. Khuallian Agriculture minister PC Vanlalruata chuan, Mizoram loneitute aṭangin buhhûm lei theih dan tur zir chian mek a nih thu a sawi.
PC Vanlalruata chuan, Mizoram sorkarin tun hnaiah Chief Minister kaihhruai 'The Mizoram State Government Paddy and Rice Procurement Committee' a din tih a sawi a, "Committee hnuaia din task force-in loneitu aṭangin buhhûm leh buhfai leisak theih a ni em tih zir chian a ni dawn. Sorkarin support price siamin thlai pali lei tur ruahmanna a kalpui bakah hian buhhûm lei turin zirchianna kalpui mek a ni," a ti.
Khawvel changkang leh hmasawn zel mila insiamrem thiam a ṭul thu sawiin Minister chuan, "Khawl hmanga hnathawh kan uar deuh deuh a ngai a, sorkar pawhin hemi kawngah hian mamawh dan azirin ruahmanna a siam zel dawn. Mizoramah buh leh thlai chìnna tur hmun ṭha tak tak vawiin thlenga la hman ṭangkai loh eng emaw zat a awm," a ti a; hman ṭangkai vek a nih chuan Mizoramin eikhawp bakah thawn chhuah tur a thar thei dawn niin a sawi.
Sensitization Programme on Implementation of Paddy Procurement hi Agriculture and Farmers Welfare secretary Ramdinliani'n a kaihruai a; Planning deputy director Dr Samuel Lalliansanga'n paddy procurement programme kalpuinaa hriat tur pawi-mawh leh tun hnaia Tripura tlawha zirchianna an neih chungchang te, Kolasib leh Mamit district-a wet rice cultivation (WRC) area zirchianna neih dan (survey report) a sawifiah.
INHRILHFIAHNAA TARLANTE
▶ Kolasib leh Mamit district-ah kumina buh chìnna leilet hectare 1,280-a zau zirchianna aṭangin buhhûm qtl. 27,194 thar theih beisei.
▶ Kolasib leh Mamit district-ah buh chìnna leilet zau (WRC cluster) 121 a awm a, leilet neitu 2,252 an awma chhût a ni.
▶ Leilet neitute chu buh chíng uar tur leh hralh chhuah tham nei tura ṭan la tura chah an ni.
▶ Ram leilung fate ngeiin a hlâwkna an têl ngei theih nana hmalak a ṭul.
▶ Loneitute aṭanga buhhûm lei leh public distribution system thlun zawm turin minimum support price siam a ṭul.