Nilawma'n Union minister-te a kâwm

Minister of state Prof. Lalnilawma chuan July 23, Thawhlehni khan New Delhi-ah a department enkawl kaihhnawiha sorkar laipui minister-te a kâwm a; India ram puma Krishi Vigyan Kendra (KVK) thar 121 din tura ruahmanna kal mekah Mizorama district thar pathumte telh a nih thu an lo hrilh.

Prof. Lalnilawma hian Agriculture & Farmer's Welfare leh Rural Development changtu minister Shivraj Singh Chouhan leh Jal Shakti minister CR Patil a kâwm a ni.

Saitual DC-in Saitual district tana Krishi Vigyan Kendra din sak tura dilna a thehluh tawh chu Lalnilawma chuan Union Agriculture & Farmer's Welfare Minister-ah a bawhzui a; Shivraj Singh Chouhan chuan, India ram puma KVK thar 121 din turah Mizorama district thar pathumte telh a nih thu leh, KVK thar dinna tura ruahmanna chu Expenditure Finance Committee (EFC) pawmpui tura thehluh a ni ang a, a dinhmun hriat thuai beisei a nih thu a sawi.

Prof. Lalnilawma chuan Shivraj Singh Chouhan chu Mizoram thlai tharte hralhna ṭha zawk a awm theih nan hmalakpui tur leh Mizoram tan Centre of Excellence for Mushroom ruahman turin a ngen. Shivraj Singh Chouhan chuan, puih an inhuam thu leh mán zawka thlai hralh a nih theihna tura sawngbawlnaah kutkawih eizawnna khawihtute tan ṭanpuina a awm theih thu a sawi a; shitake mushroom leh a dangte thar leh ram pawna thawn chhuahna turah nasa zawka a puih tur thu a lo hrilh.

Minister Lalnilawma chuan, tuna Mizoramin a mamawh ber pakhat chu farm connectivity a nih thu sawiin, huan/zau inkalpawhna kawng siam a nih theih nan ṭanpuina an mamawh thu a sawi a; Union Minister chuan, kum tharah scheme siam a nih theih nan ruahmanna duan a ṭul tur thu a sawi.

Rural Development chungchangah Prof. Lalnilawma chuan, MGNREGA Cluster Facilitation Project (CFP) hnuaia hna thawkte hlawh tur cheng vbc. 2.47 Mizoramin a la dawn loh thu Shivraj Singh Chouhan hnenah a thlen a; Union Minister chuan, pek chhuah thuai a nih theih nan a bawhzui nghal tur a lo hrilh.

Ministry of Jal Shakti minister CR Patil hnenah PHE minister Prof. Lalnilawma chuan, Cyclone Remal-in Mizorama tui pump khâwl a tihchhiat thu leh harsatna hrang hrang sorkar laipuiah thehlut a nih tawh thu a thlen a; Mizorama ruahtui khawlna kalpui dan tur leh tlang kar remchang laia tuikhuah siam a pawimawh thu a thlen bawk.

CR Patil chuan, Mizoram PHE Minister rawtna leh thu thlente tihlawhtling turin zirchianna kalpui hnuah a ṭul anga bawhzui a nih tur thu a sawi a ni.

Prof. Lalnilawma hian Small Farmers’ Agri-Business Consortium (SFAC) Chairman-cum-Managing Director office a tlawh a, honey project thehluh tawh chungchang a bawhzui a ni.