Aikal late inchinfel hun lai a nih avangin hna khaihlak a awm thei - Lunglei DC

Lunglei bawrhsap R Lalṭhazuala chuan July 23, Thawhlehni khan a pisaah Mizoram Journalists' Association (MJA), Lunglei district member-te thingpui inpuiin a kâwm a; aikal late inchinfel hun lai a nih avang leh thawktu indaih lohna avangin DC office-ah hna khaihlak a awm theih thu sawiin, hriatthiam an ngaih dawn thu a sawi.

R Lalṭhazuala chuan, mipui tana thawk an nih angin mipui mamawh leh harsatnate a rang thei ang bera chinfel an tum tih a sawi a, "Sorkar thupek anga aikal inchin fel hun lai a nih avang leh thawktu indaih lohna avangtein eng emaw chenah mipui hriatthiamna kan mamawh dawn a, kawnghmang nei leh felfai zawka hna thawh a nih theih nan thawktute hna chanpual siam rem mek a ni," a ti.

Certificate hrang hrang, a bikin tribal certificate leh OBC (other backwared class) certificate pekah tihsual palh a pawi theih thu sawiin DC chuan, "Uluk lehzuala kalpui kan tu," a ti a; Lunglei khawpui inrêlbàwlna chungchangah Lunglei Municipal Council (LMC)-in thuneihna leh inkaihhruaina a neihte a nih dan tur taka kalpui a nih theih nan LMC nen thawhhona ṭha neih zel an tum tur thu a sawi.

R Lalṭhazuala chuan, fûr ruahtui tla nasa karah veng hrang hranga inkalpawhna kawng chhia a awm leh awm loh te, in chhia a awm leh awm lohte zonal officer-te'n an vil reng thu a sawi a, "Chhiatna thleng vanga ṭanpui ngai emaw, khawl leh bungraw hman tur ngaihtuah ngai emaw a awm a nih chuan tikhawtlai loin sorkar chêtna tur angah chet nghal zel tum a ni," a ti.

Lunglei Bawrhsap hian MJA-te chu mipui hnena sorkar hmalakna puangzartu an nih angin district hmasawnna atan thawhpuiah a sawm a; MJA member-te pawhin Lunglei district enkawlnanaa an ngaih pawimawhte sawi. Inkawm-honaah hian Lungleia IPRO C Lalhruaitluanga pawh a tel a ni.