MWA-in Foundation Day an hmang

Mizo Writers Association (MWA) chuan July 23, Thawhlehni khan IPR Auditorium-ah Foundation Day an hmang a, minister Dr Vanlalthlana'n a hmanpui. Minister chuan, Aizawl North College library-a dah tur Mizo ziakmite kutchhuak lehkhabu a tlem berah Rs 20,000 man thlang turin MWA a chah.

Dr Vanlalthlana chuan, Mizo ziakmite chu Mizo history chabi kawltute an nih thu sawiin, ṭhalaite kawng dik kawhhmuh a, ram siam danglam tura kaihruaitu ni turin ziak mite a sâwm a, "Zirlaite'n Mizo literature ṭha awlsam zawka an hmuh theih a, college library-ah Mizo literature section changtlung tak a awm a pawimawh," a ti a; ANC library-a dah tur a tlem berah Rs 20,000 man Mizo ziakmite kutchhuak thlang tura MWA chahin, chhunzawm tlak a nih dawn chuan hmalak zel tur a nih thu a sawi.

MWA hi July 23, 1977 khan din a ni a, Mizo ṭawng tihhmasawn nan leh Mizo thu leh hla tihhmasawn nan hma an la ṭhin. An hmalakna zingah lehkhabu lehlin ṭha ber lawmman hlan te, Mizo Proficiency Prize siam te, Thu leh Hla Kûtpui buatsaih leh Lehkhabu Pho Runpui buatsaihte a tel.