PWD Minister-in chak takin hma a la - ZPM Ṭhalai

ZPM Ṭhalai chuan thuchhuah siamin, PWD minister Vanlalhlana hmalaknain Dárlâk leh Tuidam inkar kawngpui chhe lutuk thawm ṭha turin chak taka hmalak a nih thu an tarlang a; chak taka hmalak a ni chu lawmawm an tih thu leh PWD Minister leh thawktute an chhuan thu an sawi.

Kum dang aiin ruahtui a tlak tam avangin hna a chak thei lo tih sawiin ZPM Ṭhalai chuan, "Chuti chung chuan PWD Minister-in theihtawp chhuahin, fûr ruahtui tlak laia a theih ang anga kawng enkawl turin JCB pahnih (kawng hluiah leh kawng tharah pakhat ve ve) dah a ni a, kawng khuar zualpuite boulder hmanga a remchan ang anga hnawh ṭhin a ni. Leiminin PWD a tihbuai em em karah a pawimawhna hriain sorkarin a theih anga hmalak zel a tum," an ti.

ZPM Ṭhalai tarlan danin, Darlak-Tuidam kawng hi NH-44A/108 a ni a, kawng siam turin Gayatri Project Limited thlan a ni. Contractor-in hna an thawh muan avang leh hna a ṭhat tâwk loh avangin August 24, 2023-ah contract tihtawp a ni a; hna la awm (balance work) thawh zawhna turin estimate siamṭhat a ni. Balance work estimate cheng vbc. 169.75 chu Ministry of Road Transport & Highways-ah a thang mek a, hmuh thuai beisei a ni.

Tuidam kawng hlui chei ṭhat nan One Time Improvement Estimate cheng vbc. 4.89 chu MoRTH-ah thehluh a ni bawk a, sanction nghah mek a ni.

Sum nghah chhungin kawng chhe zual thawm ṭhatna atan PWD minister Vanlalhlana'n theihtawp a chhuah tih tarlangin ZPM ṭhalaite chuan, "Tuidam approach road resurfacing tih nan Minister-in cheng nuai 101.90 a ruahman a, AAES pawh a tichhuak tawh. Fûr ruahtui tlak zawh veleha blacktopping hna thawk turin ruahman­na siam mek a ni," an ti.