Kawng chhia siam turin MIMA-in thuneitute phût

Mizoram Merchant Association (MIMA) chuan thuchhuah siamin, Aizawl khawpuiah zing lam leh tlai lamah lirtheia bungraw hlân leh hlân thlak phal a ni lo chu ṭha lo an tih thu an tarlang a; Thingdawl leh Kawnpui inkar kawngpui chhe lutuk chu siamṭhat thuai an phût thu an tarlang bawk.

MIMA chuan, Aizawlah Thawhṭanni aṭanga Zirtawpni inkarah holiday pawh huam veka lirthei tam zual lai zing/chawhma lam dar 8:30-11:00 inkar leh chawhnu/tlai lam dar 3-6 inkarah lirtheia bungraw hlan leh hlan thlak phal a ni lo chu ṭha lo an tih thu an tarlang a, "Sumdawngte min ngaihtuah lo hleah kan ngai. Sumdawngte'n sorkara sum kan chhûn luh hnem theih nan tuna order hi ngaihtuah ṭha leh tur leh, a tuartu sumdawng pawlte min ráwn turin kan ngen a ni," an ti.

MIMA chuan, tunlaiin Thingdawl leh Kawnpui inkar kawng a chhe zual tih tarlangin, "Sorkar hian he kawng hi ngaihtuah hle turin kan ngen. Kawng hi kan lifeline a nih bik zual avangin siamṭha rang turin sorkar kan ngen tak meuh a ni," an ti a; kawng chhia avangin bungrua rei rei tak tak a thang ṭhin chu sumdawng mai ni lo, ram tan hlohna a nih thu an sawi.

MIMA chuan, Mizoram chu Income Tax act Section 10(26) hnuaiah income tax âwl a ni reng chunga Income Tax department-in lehkha pea an tibuai fo chu ṭha lo an tih thu an tarlang a, "Mizote min chhaih buai a, sumdawngte rilru hah taka siama min awmtir hi ching tawh lo se kan duh," an ti. Income Tax aṭanga lehkha hmu emaw, online aṭanga dawnga harsatna neite chu MIMA Office-ah inhriattir turin an chah a ni.