Hmun pathumah heroin man

Excise & Narcotics Department (END) leh Central YMA Kumpuan Committee chuan nimin zing dar 12:40 khan Bawngkawn (Zosangliana Point)-ah heroin gram 450 (hawng 38) leh a neitua puh mi pali an man.

Heroin neitua puhte chu - Lalhriatpuia Renthlei (29) s/o Laldinpuia Renthlei, Khawzawl, Vanlalrova (41) s/o Hmingsawienga (L), Rangvamual, Lalhmachhuana (42) s/o Zahlira (L), Bawngkawn Shalom Veng leh, Aloysious Lalrinchhana (32) s/o LT Mawia, Bawngkawn Shalom Veng nia inchhálte an ni a; heroin phurhna lirthei Taxi MZ-01 R-1762 an hréng nghal.

END chuan July 23, Thawhlehni tlai dar 6 khan Bethlehem Vengthlangah heroin gram 28 (hawng 2) leh a neitua puh mi pathum - Lalrodinga (49) s/o Kapthiauva (L), Tamu, Myanmar, Lalawmpuia (34) s/o Lalthangvunga, 1st Bn MAP quarters, Armed Veng leh, Lalbiakchhunga (27) s/o Lalmuanchunga, Mission Vengthlang nia inchhálte an man bawk.

Assam Rifles pawhin July 22, 2024 khan Mélbûk, Champhai district-ah Khawzawl Darngawna cheng nia insawi mipa pakhat hnen aṭangin heroin gram 57 an man a; July 22 vêk khan Melbukah mi pahnih, Vanzau leh Khuanglenga cheng nia insawite hnen aṭangin heroin gram 138 an man bawk. Heroin an mante chu Zokhawthar police hnehah an hlan a ni.