Mamit dist-ah sorkar sikul 296 leh mimal sikul 52 a awm mek

Mamit District Education Committee chu an chairman Jacob Lalawmpuia, bawrhsap hoin nimin khan an ṭhukhawm. Mamit district-ah sorkar sikul 296-ah zirlai 20,142 leh zirtirtu 1,739 bakah, mimal sikul 52 a awm tih tarlan a ni.

Jacob Lalawmpuia chuan, Mamit district-in zirnaa hma a sawn theih nan sorkarin theihtawp a chhuah tih a sawi a, "Khawi emaw laiah a nihna tur anga hnathawh loh emaw, tih loh tlemtê avangin district angin hmai a bâl thei. Zirna lama thawktu leh a nawr kal theitu kan ni vek tih inhriain theihtawp i chhuah tlang ang u," a ti.

Mamit district project coordinator Laldingliana tarlan danin, Mamit district-ah sorkar sikul 296-ah zirlai naupang 20,142 leh zirtirtu 1,739 an awm mek a, mimal sikul 52 a awm bawk.

Ṭhutkhawmah hian Mamit district chu aspirational district a nih anga sikul tina hmasawnna hnathawh leh hmachhawpte thlirho a ni a; Mamit district-a awm tur zirtirtu, hmun danga awm (attach) chungchang leh aikal lak tihtawp chungchangte sawiho a ni.

PMJVK hnuaia West Phaileng leh Mamit Luangpawla sport complex sak mekte chu Mizoram State Sport Council-te biakrâwna zirna lama hmasawnna atan hman ṭangkai tel dan zawn ni se, an ti.