KHAWTHLIR

August 2024 ral hmaa sem phût

Mizo Zirlai Pawl Gen.Hqrs chuan, sorkar sikula zirlaibu la sem kim lohte chu August 2024 chhung ngeia pek kim an phût thu an tarlang. MZP chuan, zirlaibu la sem kim loh chungchangah School Education Minister-in chinfel dan kawng zawng loin, sorkar hmasa dem zawng ringawtin ṭawngkam a nei niin an sawi a, hriatthiam har an tih thu an tarlang a ni.

Kuhva rah man

Assam Rifles chuan July 22, 2024 khan Ruantlangah ram dang aṭanga lak luh kuhva rah ip 107 (kg. 8,560) an man a, July 23, Thawhlehni khan Champhai Tlangsamah kuhva rah ip 23 (kg. 1,840) an man bawk. Kuhva rah leh a neitute chu Champhaia Customs mite hnenah an hlan.

Synod leh MIMA

Mizoram Merchant Association (MIMA) hruaitute leh Synod Social Front hruaitute chu July 23, 2024 khan MIMA Office, New Market-ah an inkâwm. Synod Social Front hotute hian Synod 2023-a rorel, 'Mizorama hnam dang dan loa sumdawng tihrem' chungchang an bawhzui a, hmalak dan tur MIMA hruaitute an sawipui a ni.

Ram dilna sawiho

Saitual District Land Committee chu an chairman Dr Lalngura Tlau, DC hoin nimin khan an ṭhukhawm a, mimal ram dilna periodic patta pasarih leh house pass 15 bakah, kohhran ram dilna pakhat an ngaihtuah. Bawrhsap chuan, ram nei si, pass la nei lote pass siamsak chu sorkara chhiah luh tamna a nih avangin pass siam zung zung turin mipui a chah. Ṭhutkhawmah hian sorkar department hotu te, tlawmngai pawl leh political party aiawhte an tel.

Kawng chhia sawiho

Serchhip bawrhsap Paul L Khuma, Competent Authority for Land Acquisition (CALA) hoin nimin khan DC meeting hall-ah fûrpuiin Chhiahtlang, Chhingchhip, Bungtlang, Baktawng, Keiṭum leh Serchhip bypass-a NH-54 kawngpui laih mek a tihchhiat leh a kaihhnawih harsatnate sawiho a ni. NH kawngpui enkawltu NHIDCL hotute leh an hnuaia contractor-te chuan kawng chhiate siamṭha turin hma an lak chhunzawm tur thu an sawi.