World Cancer Day hman a ni MSCI atan cheng vbc. 45.27 hmu

Nimin, February 4 kha World Cancer Day a ni a, Health minister Lal Thanzara hoin Electric Veng YMA Hall-ah hman a ni. Minister chuan, cancer damdawi-in, Mizo­ram State Cancer Institute (MSCI) tihchangtlunna turin sorkar laipuiin cheng vbc. 45.27 pek a remti tawh tih a sawi.

World Cancer Day hmanna in­khawm hi Hospital & Medical Education director Dr Lalbiakkima'n a kaihruai a; minister Lal Thanzara chuan, Zemabawka MSCI tih­changtlunna turin Central sorkarin Tertiary Cancer Care Centre (TCCC) scheme aṭangin cheng vbc. 45.27 a rawn pek tur thu a sawi a, "He sum hi damlo enkawlna khawl leh a dahna tur in sakna atan chauh hman phal a ni a, a hmuna an rawn enfiah hnuah sum hi an rawn pe chhuak dawn a ni," a ti.

Lal Thanzara chuan, MSCI tihchangtlunna tur cheng vbc. 45.27 chhungah hian cancer hemna khawl ṭha ber chi leh khawl leh hmanraw dangte lei tum a nih thu a sawi a, "MSCI building hi sak ṭhata tihlen a ni dawn a, khum 100 leng tura sak tum a ni. Cancer enkawlna chi kim – diagnostics, screening, zai, hem (radiotherapy), chemotherapy, palliative therapy, counseling leh rehabilitation-te hmun khatah a tih theih vek tawh dawn a ni," a ti.

Health Minister chuan, cancer leh natna dang laka inven, hmuhchhuah hma leh ṭha taka enkawlnate chu mipui ban phâka a awm theih nan sorkarin theihtawp a chhuah zel thu sawiin, "NPCDCS hmangin tunah hian Aizawl, Lunglei, Saiha leh Champhaiahte hmalak ṭan mek a ni," a ti a; cancer enkawlnaah theihtawp an chhuah zel thu a sawi.

Lal Thanzara chuan, Mizote chu a tlangpuiin kan nat hunah chauh doctor leh damdawi-in kan pan ṭhin thu sawiin, hrisel zawk nan insawiselna neih kher loh pawhin a khát tâwka damdawi lam thiamte ráwn ṭhin turin mi tinte a chah a ni.

Inkhawmah hian HME deputy director leh NCD nodal officer Dr Eric Zomawia leh oncologist Dr Jerry L Pautu ten cancer leh natna dang laka inven dan, vei awlsam dan leh a veite enkawl dante an sawi a; Health secretary Arun Goyal, principal director Dr K Ropari leh Electric Veng MHIP president ten thu an sawi bawk.

World Cancer Day puala inkhawm hi National Programme for Prevention & Control of Cancer, Diabates, Cordiovascular Diseases and Stroke, National Programme for Prevention & Control of Deafness) leh Mizoram State Cancer Institute-te buatsaih a ni.

Inkhawm zawhah special clinic neih nghal a ni a, cancer, medicine, gynae leh ENT lama doctor thiamte'n mipui hriselna dinhmun an enfiah a ni.

Mizorama 2010-2014 chhunga cancer

Cancer vei thar - Mi 5,888

(mipa 3,229; hmeichhia 2,659)

Cancer vanga thi - Mi 3,137

(mipa 1,847; hmeichhia 1,290)

Pumpui cancer - Mi 1,105

(mipa 750; hmeichhia 355)

Chuap cancer - Mi 857

(mipa 436; hmeichhia 421)

Chaw dáwt cancer - Mi 503

(mipa 427; hmeichhia 76)

Chhùl hmáwr cancer - Mi 364

(hmeichhia vek)

Hnute cancer - Mi 289

(mipa 4; hmeichhia 285)