Khawthlir
Lamp lighting
Mission Foundation Movement School of Nursing, Bawngkawn chuan nimin khan nurse (ANM) batch ruknaa zirlai tharte pualin I&PR Auditorium-ah Capping and Lamp Lighting Ceremony an hmang a, Aizawl Municipal Council chairman Zarzoliana'n a hmanpui.
Disaster training
Lunglei District Disaster Management Authority leh YMA sub-headquarters, Lunglei hnuaia Disaster Management Committee-te chuan nimin khan Vanhne khuaah chhiatna hmachhawn dan zirna an buatsaih a, Lunglei addl. DC Roṭhuama'n a hmanpui.
In kâng ral
Lawngtlai district-a Lungzarhṭum khuaah nimin khan Lalfakzuala in, Assam type a kang a, bungraw chuh hman lohin a kâng ral a, thi leh hliam an awm lo. Lungzarhṭum YLA hruaitute sawi danin, in hi thuka mei tihmih fel loh aṭanga kâng nia rin a ni a; YLA chuan nimin khan an khuaah ṭanpuina an khawn nghal a, vawiinah hnatlangin in sak ṭhatsak an tum a ni.
Zo turin ngen
Tuichangral Zirlai Pawl (TCZP) chuan thuchhuah siamin, PMGSY hnuaia East Lungdar–Sailulak kawng laih thar blacktop hna thawh mek chu hun tiam chhunga thawk zo hman turin Mizoram sorkar leh contractor-te an ngen a; mipuite chu kawng siam lai lo vil ve turin an chah.
Lusun khawhar
Ngurlianzuala Sailo s/o Lalthlana, Ramhlun North chu nimin tlai khan lungphuchawlin a thi a, vawiinah vui a ni ang. Ngurlianzuala hi Vanglaini chanchinbu semtu a ni a, semtu thar an awm leh hma chu Bawngkawn leh Ramhlun North hmun ṭhenkhatah Vanglaini an hmu thei rih dawn lo a ni.
MTKP Rorel
Zanin hian BCM Rahsi Veng biak-inah MṬKP Rorel vawi 61-na ṭan a ni dawn. MṬKP Rorel inkhawmpuiah hian zaninah palai lawm a ni ang a, naktukah rorel inkhawm neih a ni ang.