Bru helho puitu nia hriat man a ni

February 2, 2015 zinga Mamit district-a Dampa ngaw chhung, Chikha leh Tuipuibari inkara Bru hel, NLFT leh BDFM mi nia hriatte'n mi pahnih an rûkbote chu an la hrêng zel. Hetih lai hian, police-te chuan mi rubotute ṭanpuitu nia hriat mi pakhat an man.

Police hotute hnen aṭanga thu dawn danin, Bru hel pawlte hian an mi rûkbo pahnih - BRTF overseer Hukum Singh leh driver Mohammed Buizul Islam (Thangchhuaka/Zoluta) te chu Bangladesh ramah an luhpui tawh a; hei vang hian chhanchhuak turin chak taka hmalak a harsa a, mahse, fimkhur takin an thlithlai reng a ni.

Rubotute hian mi an rûkbo chhan emaw, tlanchhuahna sum phût emaw an neih thu an la puang loa hriat a ni a, rûkbo chhungte pawh an la be lo.

Police hotute chuan, mi pahnih rubotute chu NLFT leh BDFM hel mi pakua an ni a, AK-47 Rifle pakua leh chem an keng tih an sawi a; sipai inthuama inthuamin, ramhnuai aṭangin kein an kal a, mi an rûkbo hnuah ramhnuai lam bawk an panpui leh niin an sawi.

NLFT leh BDFM pawla mite'n Hukum Singh leh Zoluta an rukbo theihna tura lo puitu nia hriat, Raj Mani, Tuipuibari-I chu police-te'n an man tawh a; Raj Mani hi BNLF pawla lo tel ve tawh ṭhin a ni.