Mamitah NH-44(A) laih mek sawiho

MJA, Mamit district huaihawtin February 3, 2015 khan Mamita I&PR Conference Hall-ah NH-44(A) kawngpui double lane-a laih mekin kawng a tihchhiat chungchang sawiho a ni a; February 2015 chhung ngeia kawng khuar zual laite hnawh tur leh siamṭha tura ruahmanna siam a ni.

Sawihonaah hian kawng siamtu contractor Gaytri Project Ltd. aiawhte bakah, Mamita tlawmngai pawl hrang hrang aiawhte an tel a; kawng khuar zual laite chu February thla chhung ngeia hnawh mâm turin an inrem a, contractor (company)-te aiawhte chuan February 4-ah hmanruate an dah nghal tur thu leh kar leh lamah an thawh nghal tur thu an sawi.

NGO-te chuan contractor-te chu leivungte a paihna hmun (dumping ground)-ah chiah paih tawh turin an ti a; hmun hrang hranga lai lo a, an laih chinte zo fel nghal zel turin an ngen bawk.